Монгол Улсын Ерөнхийлөгч Ц.Элбэгдорж энэ сарын 19-24-ний өдрүүдэд Нью-Йорк хотноо болох НҮБ-ын Ерөнхий Ассамблейн 71 дүгээр чуулганы Ерөнхий санал шүүмжлэлд оролцож, олон улсын харилцааны тулгамдсан асуудлаар Монгол Улсын байр суурийг илэрхийлж үг хэлнэ.

Мөн 2015 онд НҮБ-ын Дээд хэмжээний уулзалтаас баталсан тогтвортой хөгжлийн зорилтуудыг хэрэгжүүлэх чиглэлээрх олон улсын хамтын нийгэмлэгийн хүч чармайлтад хувь нэмрээ оруулж, үүрэг амлалтаа биелүүлэхээ нотлохын зэрэгцээ "Монгол Улсын тогтвортой хөгжлийн үзэл баримтлал 2030", үндэсний хөгжлийн зорилтуудаа дэлгэрэнгүй танилцуулах аж.

Түүнчлэн НҮБ-ын Ерөнхий нарийн бичгийн даргын санаачилсан Өндөр түвшний арга хэмжээнд оролцон, зарим улсын төр, Засгийн газрын тэргүүнтэй хоёр талын уулзалт хийж, харилцаа хамтын ажиллагааны асуудлаар ярилцах юм байна.