-Рио-де-Жанейро хотоос мэдээлж байна-

Рио-2016 олимпийн наадмын боксын 60кг-ын хагас шигшээд шалгарч медалийн болзол хангасан ОУХМ Азийн наадмын аварга, Ази тивийн аварга, дэлхийн чансааны хоёрдугаарт байрт бичигдэж буй Доржнямбуугийн Отгондалай медалийн өнгө хувиргах тулаанаа дөнгөж сая хийлээ.

Тэрбээр Францын боксчин Софьян Үмиятэй тоглож хожигдсноор хүрэл медаль хүртлээ. Түүний хувьд шүүлтэд сэтгэл дундуур байж "Монголын ард түмэн намайг яаж тоглосныг харсан байх аа" хэмээн уйлж байсан юм.

Өрсөлдөгч нь 21 настай. 2015 оны Дохагийн дэлхийн аварга шалгаруулах тэмцээнд шагналт V байранд шалгарч байсан, дэлхийн чансааны зургадугаарт бичигдэж буй боксчин байсан юм.

Д.Отгондалайгийн хувьд олимпийн наадмын медальт долоо дахь боксчин. Н.Энхбат, Н.Баярсайхан нарыг залгамжлан олимпийн хүрэл медальтан болж байна.

Монголын боксчид ийнхүү Бээжин, Лондон, Рио-де-Жанейрогийн олимп дараалан эх орондоо медаль авчирлаа.