УИХ-ын болон Нийслэлийн ИТХ-ын ээлжит сонгууль зургаадугаар сарын 29-нд болохтой холбогдуулаад иргэдийг сонгуульд оролцон саналаа өгөх боломжоор хангах зорилгоор   энэ өдөр архи, согтууруулах ундаа худалдахгүй байх, олон нийтийг хамарсан арга хэмжээ зохион байгуулахгүй  байх тухай нийслэлийн Засаг дарга захирамж гаргажээ.  

Тус захирамжид зааснаар энэ өдөр зохион байгуулах  ямар ч арга хэмжээнд  холбогдох байгууллагуудаас зөвшөөрөл олгохгүй гэнэ.  Мөн олныг хамарсан соёл урлаг, үзвэр үйлчилгээ, спортын арга хэмжээг зохион байгуулахгүй.  

Зургаадугаар сарын 29-ний өдрийг бүх нийтийн амралтын өдөр байхаар хуульчилсан. Энэ өдөр онцгой шаардлагаар ажиллах байгууллагууд ажилтнуудаа санал өгөх боломжоор хангах үүрэгтэй. Тиймээс нийслэлийн нутаг дэвсгэрт үйл ажиллагаа явуулж буй хүнс, барилгын материал, мод,  модон  материал, түүхий эд, техникийн захууд, томоохон худалдааны төвүүдийн  долоо хоногийн амралтын өдрийг сонгуулийн санал авах өдөр буюу 29-нд шилжүүлж байгаа ажээ.
Түүнчлэн  өмнөх сонгуулиудын жишгээр гэмт хэргээс урьдчилан сэргийлэх үүднээс  нийслэлийн хэмжээнд архи, согтууруулах ундаа худалдах, түүгээр үйлчлэхийг хориглолоо.  Үүнд Улаанбаатар хотын цагдаагийн газар, Нийслэлийн Мэргэжлийн хяналтын газар хамтран хяналт тавьж ажиллах

Мөн тухайн өдөр санал авах байрны телефон утас, цахилгаан эрчим хүчийг  тасралтгүй, найдвартай хангах үүргийг  Улаанбаатар цахилгаан түгээх сүлжээ ХК, Мэдээлэл холбооны сүлжээ Төрийн өмчит компанийн удирдлагуудад өгсөн байна. Мөн хотын нийтийн тээврийн үйлчилгээг хэвийн явуулах арга хэмжээ авч ажиллахыг Нийслэлийн Тээврийн газарт үүрэг болгосон гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.