АСЕМ-ын дээд түвшний 11 дүгээр уулзалтад ирэх дээд хэмжээний төлөөлөгчдөд монгол үндэсний дээл бэлэглэхээр болжээ.

Үүнтэй холбогдуулан үндэсний хувцас урладаг аж ахуйн нэгжүүдийн судалгааг хийж, хувцасны төрөл загвар, үнийн саналуудыг авсан байна. Эдгээрээс хамгийн боломжит санал ирүүлсэн компаниудын саналыг АСЕМ-ыг зохион байгуулах, чиг үүргээр хангах Үндэсний зөвлөлийн хуралдаанаар хэлэлцэж, хамтарч ажиллахаар болсон байна.

Түүнчлэн дээд түвшний уулзалтад оролцохоор ирэх төлөөлөгчдийн ёслол, хамгаалалтад ашиглагдах 250 автомашин, тэдгээрийг жолоодох 293 жолоочийг Авто тээврийн хэрэгслийн болон Жолоочийн хариуцлагын даатгалд хамруулах нь зүйтэй гэж Үндэсний зөвлөлөөс шийдлээ.

Дээрх тээврийн хэрэгслүүдийг “Моннис моторс” ХХК оруулж ирсэн бөгөөд дээд түвшний уулзалтын дараа тус компани худалдаж борлуулах аж.

Дээд түвшний уулзалтыг сурвалжлах гадаад, дотоодын сэтгүүлчдэд зориулж “Шангри-Ла” худалдааны төвд “Хэвлэлийн төв” байгуулахаар ажиллаж байгаа бөгөөд энэ ажлын хүрээнд АСЕМ-ын арга хэмжээ зохиогдох цэгүүдтэй шилэн кабелийн сүлжээгээр холбогдох зайлшгүй шаардлагатай байгааг холбогдох хүмүүс танилцууллаа.

Уг ажлыг хийж гүйцэтгэхэд тулгарч байгаа зарим бэрхшээлийг шийдэж, нийтийн эзэмшлийн талбайг чөлөөлөн сувагчлал татах ажлыг даруй эхлүүлэхийг Ерөнхий сайд, АСЕМ-ын дээд түвшний 11 дүгээр уулзалтыг зохион байгуулах, чиг үүргээр хангах Үндэсний зөвлөлийн дарга Ч.Сайханбилэг үүрэг болгожээ.