Дэлхийн холын зайн гүйлтийн уламжлалт 6 ба 10 өдрийн “Self-transcendence” USA open тэмцээн АНУ-ын Нью-Иорк хотноо дөрөвдүгээр сарын 19-нд эхлээд, тамирчид бариандаа ороход хэдхэн цаг үлджээ.

Тус тэмцээнд дэлхийн 25 орны 75 гүйгчид оролцож байгаа бөгөөд Монголоос уулын болон марафон гүйлтийн мастер Б.Буджаргал, Баянгол дүүргийн тамирчин эмч, спортын дэд мастер С.Оюунгэрэл нар 10 өдөрт Чингэлтэй дүүргийн ахмад тамирчин Ж.Одгийв, Орхон аймгийн тамирчин Т. Түвшинжаргал нар тус тус 6 өдрийн гүйлтэд амжилттай гүйж байна.

Энэхүү гүйлтийг нэрт тамирчин Шри Чинмой 1995 онд анх санаачилсан бөгөөд өдгөө 10 өдрийн гүйлт нь 21 дахь жилдээ, 6 өдрийн гүйлт нь 19 дахь жилдээ Нью-Йорк хотноо "Флашинг Медов" цэцэрлэгт хүрээлэнд Дэлхийн болон Америкийн гүйлтийн холбооны албан ёсны зам дээр 1 миль буюу 1,6 км-ийн тойргоор явагдаж байна.

Гүйлтийн тэмцээний ялагчийг 10 ба 6 өдрийн туршид хамгийн хол зай туулсан 50 аас доош насны ангилалд эхний 7, 50-59 насанд эхний 3, 60-69 насанд эхний 2, 70-аас дээш насны ангилалд эхний 1 гүйгчийг шалгаруулж байр эзлүүлнэ.

Тэмцээний 9 өдөр буюу 221 цагийн байдлаар 10 өдрийн гүйлтийн  тэмцээнд Сарах эмэгтэй /Австрали/ 618 мил буюу 994,6 км, Коби Орен эрэгтэй /Америк/ 708 мил буюу 1139,4 км гүйж тэргүүн байрт яваа бол 6 өдрийн тэмцээнд эхний 5 өдрийн байдлаар Викена Ютц эмэгтэй /Америк/ 326 мил буюу 524,6 км,  Аидас эрэгтэй /Герман/ 456 мил буюу 733,8 км-ээр тэргүүн байрт явж байна.

Харин 10 өдөрт гүйж байгаа монголын тамирчин

• Б. Буджаргал 873,8 км ээр 9-рт,
• С. Оюунгэрэл  787,0 км ээр 7-р байрт,

6 өдөрт гүйж байгаа

• Ж. Одгийв 367 км ээр 12-р,
• Т.Түвшинжаргал 294 км ээр 13-р байруудад тус тус явж байна.

Тэмцээн Улаанбаатарын цагаар 4-р сарын 30-ны үүрийн 01.00 цагт өндөрлөж, ялагчаа шалгаруулах юм байна.

Б.ДОРЖБАТ