Загвар зохион бүтээгч Ариунаа Сүри  Данийн гоёл чимэглэлийн DYRBERG/KERN брэндтэй хамтран "THE SPRING fashion’s night out"  загварын шоугаа толилууллаа.

Энэхүү шоунд Ариунаа Сүри үндэсний уламжлалт хувцасны элементийг шингээсэн өдөр тутмын, спортын чөлөөт загваруудаа DYRBERG/KERN-ийн гоёл чимэглэлүүдтэй хослуулан танилцуулсан юм.

Түүний талаар англи хэлээр цацагддаг NHK World телевизийнхэн баримтат кино хийж байгаа тул загварын шоунд зочноор хүрэлцэн иржээ.

Загвар зохион бүтээгч Ариунаа Сүригийн шинэ коллекцийнх нь талаар асуухад:

-Бид хаврын загвараа танилцууллаа. Хаварт зориулж спортлог, чөлөөт, өдөр тутмын загваруудаа хийсэн юм. Загваруудыг маань Монголын бүх залуус өмсөх боломжтой.

-Таны талаар NHK World телевизийнхэн баримтат кино хийж байгаа гэсэн?

-Манай хамт олны талаар тус телевизийнхэн надтай долоо хоног хамт  явж, зураг авалт хийж байна. Энүүгээрээ дэлхий нийтэд гарах баримтат кино хийнэ гэсэн.  Монголоо төлөөлөөд, Монголын загварын салбарыг сайн түвшинд үзүүлэхийн төлөө маш их хичээж ажилласан. Найз нөхөд маань их тусаллаа. Их баяртай байна.

Шоуны үеэр "Камертон" хамтлагийн дуучин Ганаа, "Киви" хамтлагийн дуучин Ука нар ая дуугаа өргөлөө. Мөн Ариунаа Сүри болон DYRBERG/KERN брэндийн танилцуулга, худалдааг зохион байгуулж байв.

Гэрэл зургийг Д.Жавхлантөгс