"Найрсаг Улаанбаатар" хөтөлбөрийн хүрээнд гуравдугаар сарын 23-26-ны өдрүүдэд ОХУ-ын Москва хотод болсон 23 дахь удаагийн MITT үзэсгэлэнд Улаанбаатар хот оролцлоо.

2015 оноос эхлэн олон улсын аялал жуулчлалын зах зээлд Улаанбаатар хотыг соёлын болон бизнес жуулчлалын бие даасан зорих газар болгон сурталчлах ажил эхэлсэн бөгөөд 85 орны 2000 гаруй аялал жуулчлалын байгууллага улс, хот, аяллын бүтээгдэхүүнээ танилцуулсан тус үзэсгэлэнд анх удаа Монгол улсаас Нийслэлийн Аялал жуулчлалын газар, МИАТ ХК, Нью Жуулчин групп оролцлоо. 

Үзэсгэлэнг 32,000 гаруй мэргэжилтэн үзэж сонирхсоны 54 хувь нь аяллын агент, 21 хувь нь тур оператор, 9 хувь нь байр сууцны үйлчилгээ эрхлэгчид, 8,4 хувь нь мэдээллийн технологи, тээврийн компанийн төлөөлөгчид байсан байна.

Үзэсгэлэнгийн үеэр нийслэлийн Аялал жуулчлалын газар хот, хот орчмын аяллын үзмэрүүд,  МИАТ ХК Москва-УБ-Москва болон Улаанбаатараас эхлэлтэй олон улсын нислэгүүд, Нью Жуулчин групп "Найрсаг Улаанбаатар" хөтөлбөрийн хүрээнд зохиогдох соёлын аялал жуулчлалын арга хэмжээнүүдийг онцгойлон сурталчиллаа. Үзэсгэлэнгийн албан ёсны дэмжигчээр НҮБ-ын Дэлхийн аялал жуулчлалын байгууллага, түнш орноор Израйль улс ажиллажээ.

2016 онд "Найрсаг Улаанбаатар" хөтөлбөрийн хүрээнд шууд нислэгтэй орнууд руу чиглэсэн гадаад сурталчилгааг идэвхжүүлж, хөрш орноос ирэх жуулчдын тоог нэмэгдүүлэх зорилгоор  ХБНГУ, ОХУ, БНХАУ, БНСУ, Японд зохиогддог олон улсын аялал жуулчлалын үзэсгэлэнгүүдэд оролцохоор төлөвлөсөн гэж нийслэлийн Аялал жуулчлалын газраас мэдээллээ.