Монголын геологи, хайгуулчид уулзан чуулах гэж байна.

Тэд геологи, эрдэс баялгийн салбар дахь төрийн бодлого, судалгаа шинжилгээний талаар хэлэлцэх аж. Мөн 2010 оноос хойш зогсоод байсан ашигт малтмалын хайгуулын тусгай зөвшөөрөл олгох үйл ажиллагаа эхэлсэнтэй холбоотойгоор төрийн болон хувийн хэвшлүүдийн өмнө тулгараад байгаа асуудлын талаар тусгайлсан хэлэлцүүлэг үүсгэхээр болжээ.

Геологич, хайгуулч, судлаачид өдөр тутам  байгалийн өвөрмөц тогтоц, сонин содон хүдэр, чулуулагтай ажилладагийн хувьд тэдгээр ховор сонин бүтэц, тогтоцтой эрдэс чулуулгийн арвин цуглуулгатай байдаг.

Чуулга уулзалтын хүрээнд “Эрдэс чулуулгийн цуглуулга, дээжис” сэдэвт үзэсгэлэнг нийтэд толилуулж, “Хүдэр, ашигт малтмал”, “Эрдэнийн талст”, “Ховор, сонин цуглуулга” гэсэн төрлөөр шилдгүүдээ шалгарууна.  Монголын Эрдэс баялгийн музейн ховор сонин үзмэр болон цуглуулагчдын цуглуулгыг олон нийтэд толилуулах нь залуу үеийн геологичид болон сонирхогчдод танин мэдэхүйн ач холбогдолтой.

Жил бүр уламжлал болгон чуулга уулзалтад оролцсон шилдэг илтгэгчид болон эх орныхоо эрдэс баялгийн сан хөмрөгийг нээн илрүүлэх, арвижуулах үйлсэд үнэтэй хувь нэмэр оруулсан хамт олныг шалгаруулдаг.

“Монголын геологи, хайгуул-2016” чуулга уулзалт 2016 оны гуравдугаар сарын 24-25- нд “Корпорейт Конвеншн төв”-д болно. 

Уул уурхайн яам, Ашигт малтмалын газар, Газрын тосны газар, Мэргэжлийн хяналтын ерөнхий газар, Монгол улсын их сургууль, Шинжлэх ухаан, технологийн их сургууль хамтран найм дахь удаагаа зохион байгуулж байна.

Дашрамд сонирхуулахад, “Монголын геологи, хайгуул-2016” чуулга уулзалтыг анх 2009 онд “Монголын үйлдвэрлэлийн геологичдийн холбоо” санаачлан зохион байгуулж байжээ.