“Монгол Контент” ХХК дэлхийн дуу хөгжмийн салбарт томоохон байр суурь эзэлдэг "Юниверсал Мьюзик Групп"-тэй хамтран ажиллахаар боллоо.

Хамтран ажилласнаар тус группын хамтлаг дуучдын дуу хөгжмийн бүтээлийг Монгол улсын нутаг дэвсгэрт албан ёсны зөвшөөрөлтэй ашиглах эрхтэй болж байгаа юм.

Түүнчлэн "Монгол Контент" ХХК-ийн контент агрегатороор ажилладаг “Мобиком” корпорацийн HiTONE, “Юнител” группын Unimusic үйлчилгээний хэрэглэгчид эхний ээлжинд "Юниверсал Мьюзик Групп"-ын дуу хөгжмийг ашиглаж эхлэх боломжтой болж байна.

Хамтран ажиллах гэрээнд “Монгол Контент” ХХК-ийн гүйцэтгэх захирал Г.Гантуяа, "Юниверсал Мьюзик Групп"-ын OXУ дахь салбарын захирал Дмитрий Коннов нар гарын үсэг зурлаа.

“Монгол Контент” ХХК-ийн гүйцэтгэх захирал Г.Гантуяа:

“Монгол Контент ХХК” нь “Монгол Мюзик” төслийг өнгөрөгч онд эхлүүлж, Монголын хамтлаг дуучид, уран бүтээлчдийн дуу хөгжмийг албан ёсны эрхтэйгээр түгээж, борлуулах, орлого цуглуулах үйл ажиллагааг явуулж байна.

Бид энэ төслийнхөө хүрээнд дэлхийн хөгжмийн зах зээлд тэргүүлэгч компани болох "Юниверсал Мьюзик Групп"-ын салбар компанитай гэрээ байгуулан дэлхийд алдартай хамтлаг дуучдын уран бүтээлийг албан ёсны эрхтэйгээр үүрэн холбооны хэрэглэгч нарт хүргэх болсондоо баяртай байна" гэлээ.

"Юниверсал Мьюзик Групп"-ын OXУ дахь салбарын захирал Дмитрий Коннов:

"Монгол Улс дэлхийн хөгжилтэй хөл нийлүүлэн алхаж, гар утасны оператор компаниуд   хөгжмийн контентыг хэрэглэгчдэд албан ёсны эрхтэйгээр хүргэхээр болж байгааг харах маш таатай байна.

Монголын хөгжмийн зах зээлд хөл тавьж, хөгжмийн шилдэг бүтээлүүдийг Монголын хэрэглэгчдэд хүргэхээр болж буй нь бидний хувьд нэр төрийн хэрэг юм" гэлээ.

"Мобиком корпораци"-ийн Зах зээл бизнес хариуцсан дэд захирал М.Энхсайхан:

"Үүрэн холбооны анхдагч бөгөөд тэргүүлэгч оператор "Мобиком" корпораци "Юниверсал Мьюзик Групп"-ын гадаад дуунуудыг HiTONE-ийн хэрэглэгчдэдээ албан ёсны эрхтэйгээр хүргэх болсондоо нэн таатай байна.

Энэхүү ажлыг "Монгол Контент" ХХК "Юниверсал Мьюзик Групп"-тэй гэрээ байгуулан хүргэх болсныг бид дэмжиж ажиллах болно" гэв.

"Юнител групп"-ын Бизнес Хөгжил, Төлөвлөлт хариуцсан Дэд захирал Д.Жамъяншарав:

"Юнител групп" өнгөрсөн жилээс Монгол дахь контент нийлүүлэгчийн албан ёсны нийлүүлэгчээр "Монгол Контент" компанийг сонгон хамтарч ажиллаж эхэлсэн.

Өнөөдөр "Юниверсал Мьюзик Групп"-тэй олон улсын дуу хөгжмийг Монголд оруулж ирэх албан ёсны гэрээг зурж байна. Бид "Монгол Контент" компанитай хамтран хэрэглэгчдэдээ Unimusic үйлчилгээгээр дамжуулан албан ёсны эрхтэй дуу хөгжмүүдийг хүргэх болсондоо баяртай байна" гэлээ.

"Universal Music Group"-ийн уран бүтээлчдээс