Дэлхийн банкны энэ онд нийтэлсэн “Бизнес эрхлэх нь” сэдэвт судалгаагаар манай улс нийт 189 орноос 56 дугаарт жагсжээ. Энэ нь Монгол Улсад бизнес эрхлэхэд төдийлөн таатай, амар биш гэсэн дохиог гаднын хөрөнгө оруулагчдад өгнө. Авлига, төрийн үйлчилгээний хүртээмж зэрэг арван үзүүлэлтээр тухайн улсын бизнесийн орчныг судалдаг байна.

Дэлхийн банк 2012 оноос хийж эхэлсэн энэ судалгаанд манай улс 2013 оноос хойш хамрагджээ.

Эдгээрээс Монгол Улсыг цахилгаанд холбогдсон байдал гэдэг үзүүлэлт ихээхэн хойш нь татаж, зөвхөн энэ үзүүлэлтээр бид 134 дүгээрт яваа юм байна. Харин дээр дурдсан үзүүлэлтүүдээр бид хоёр оронтой тоонд багтах дүн авсан бол ганцхан цахилгааны холболт л гурван оронтой буюу 134 гэсэн оноо авчээ.

Энэ байдлыг засахын тулд ямар ажлууд хийснээ “УБ цахилгаан түгээх сүлжээ” ТӨХК-ийн удирдлага өнөөдөр танилцууллаа.

Тус компани ирэх сарын 15-наас шинэ холболтын дүрэм баримтлах аж. “УБ цахилгаан түгээх сүлжээ” ТӨХК-ийн дарга С.Төмөрхүүгийн танилцуулснаар тус компани цахилгаанд холбогдох үйл ажиллагааг хялбаршуулах, богино хугацаанд, бага зардлаар холбохоор ажиллаж байгаа аж.

“Бизнес эрхлэх нь 2013” судалгаанд танилцуулснаар Улаанбаатар хотод цахилгаанд холбуулах дундаж хугацаа 126 хоног байжээ. Энэ хугацааг 79 хоног бууруулсан байна. Гэхдээ цахилгаанд холбуулах иргэн, ААН нийт найман үе шат туулсны дараа тогтой болдог байдлыг халж чадаагүй байжээ.          

Гэхдээ ирэх сарын 25-наас дагаж эхлэх шинэ холболтын журмыг мөрдөж эхэлснээр дээрх найман үе шат хоёр болж бууран, хугацаа дахин богиносно. Мөн ААН-үүд цахилгаантай болохын тулд дунджаар 40 сая төгрөг зарцуулдаг байсан бол цаашид энэ дүн 20 хүртэл хувиар буурах аж. Мөн түгээх сүлжээнд холбогдож буй шинэ объект, тоноглолын чанар, стандартад нэгдсэн хяналт тавих нөхцөл бүрдэх аж.

Гэрэл зургийг О.Сүхбат