Уул уурхай яам, Япон улсын Эдийн засаг, үйлдвэр худалдааны яам хамтран нүүрсийг хуурай аргаар баяжуулах технологийг 2013 оноос Монгол Улсад нэвтрүүлэх төсөл хэрэгжүүлэхээр харилцан тохиролцсон. 

Төслийг хэрэгжүүлэх хүрээнд Эрдэнэс Таван толгой ХК болон Японы Нагата Инженеринг ХХК нарын хооронд 2013 оны наймдугаар сарын 13-нд санамж бичиг байгуулсан юм. Санамж бичгийн дагуу талууд судалгаа, шинжилгээ, туршилтын ажлууд хийсэн бөгөөд тэдгээрийн үр дүнд үндэслэн туршилтын үйлдвэр байгуулах боломжтой гэж дүгнэжээ.

Үүний дагуу төслийн дараагийн үе шат болох туршилтын үйлдвэрийг Монгол улсад барьж байгуулах тухай Санамж бичгийг Уул уулхайн яам, Японы шинэ эрчим хүч, аж үйлдвэрийн технологийн байгууллагын хооронд өнөөдөр буюу гал бичин жилийн хаврын эхэн сарын шинийн есний билэгт сайн өдөр байгууллаа.

Мөн Эрдэнэс Монгол ХХК болон Нагата инженеринг компани хооронд төслийг хэрэгжүүлэх гэрээ байгуулж байна.

Жилийн 300 мянган тонн нүүрс баяжуулах хүчин чадалтай туршилтын үйлдвэрийн технологи нь 10-35 мм ширхэглэглэлтэй нүүрсийг Fluidized bed separator /FBS/ төхөөрөмжөөр, 0.5-10 мм ширхэглэглэлтэй нүүрсийг  Air table /AT/ төхөөрөмжөөр баяжуулах юм.

Энэхүү технологи үйлдвэрлэлд нэвтэрснээр усны нөөц хомс говийн бүсэд олон улсын жишигт нийцсэн, байгаль орчинд ээлтэй, эдийн засгийн хувьд чухал ач холбогдолтой нүүрс баяжуулах шинэ технологийг эзэмших боломж бүрдэх юм.

Гэрэл зургийг Б.Бямба-Очир