Монголын э-спортын мэргэжлийн баг TheMongolz.CS Тайваньд болж буй Inter Extreme Masters 2016 тэмцээнд Ази тивийн Counter Strike: Global Offensive-ийн шилдэг 8 багтай 100 мянган долларын шагналын сантай тэмцээнд өрсөлдөж байгаа билээ.

TheMongolz.CS баг Б хэсэгт Хятадын Tyloo, Австралийн Renegades, Тайванийн EatYouAlive зэрэг чангахан учраануудтай таарсан юм. Хятадын Tyloo багийн тоглогч Киангчи “qz” Ву өмнө нь булхайцсан асуудалтай байсан тул тэмцээнээс хасагдсан. Манай баг тэмцээний гол өрсөлдөгч Австралийн Renegades багийг 16:13-ийн харьцаатай хожсоноор хэсгээ тэргүүлсэн.

The Mongolz vs. Renegades хэсгийн аваргын төлөөх тоглолт

Хагас финалд А хэсгээс хоёроор гарсан Австралийн Chiefs багтай таарч inferno, dust2, cobble зэрэг газрууд дээр тоглож 13:16, 16:10, 16:9 (2:1)-ийн харьцаатай хожсоноор тэмцээний финалд шалгарав.

Тэд Финалд шалгарснаар дор хаяж 15 мянган ам.долларын шагналын эзэд болоод байгаа ба өмнө нь хэсэгтээ таарч байсан Австралийн Renegades багтай маргааш буюу хоёрдугаар сарын нэгний өдөр 13:00 цагаас тоглоно. Хэрвээ ялж чадвал 30 мянган долларын шагнал авах ба MLG Columbus тэмцээнд дэлхийн шилдэг 16 багтай өрсөлдөх эрхтэй болох юм.

Тоглолтод TheMongolz.CS багийн түлхүүр тоглогч Лхагваагийн “Machinegun” Энхтайван 27/11 K/D үзүүлэлттэй багаа тэргүүлэв.

TheMongolz.CS сүүлийн есөн тоглолт дарааллаж хожоод байгаа бөгөөд одоогийн байдлаар Gosugamers-ийн чансаагаар дэлхийд 25 дугаарт, Азидаа зургадугаарт бичигдэж байна.