УИХ-ын гишүүн Г.Уянга өнгөрсөн онд л Ерөнхий сайд Ч.Сайханбилэгийг огцруулах тогтоолын төсөл санаачилсан. Хамгийн багадаа 19 УИХ-ын гишүүн гарын үсэг зурснаар Г.Уянга гишүүн тогтоолын төслөө өргөн барих боломжтой байв.

Удаан “дуншсан” түүний тогтоолд бие даагчид болон МАН, МАХН-ын зарим гишүүн гарын үсгээ зурснаар УИХ-ын дарга тогтоолын төслийг хүлээн авсан юм. Ингээд өнгөрсөн долоо хоногийн пүрэв гарагт Төрийн байгуулалтын байнгын хороогоор Ерөнхий сайдын асуудлыг хэлэлцэх байсан ч ирц бүрдээгүй шалтгаанаар хойшиллоо.

МАХН-ын дарга Н.Энхбаярын шууд шахалт, шаардлагын дагуу “Шударга ёс” эвслийн бүлэг дээрх тогтоолын төслийг дэмжихгүй гэв. Гэсэн ч УИХ-ын гишүүн Г.Уянга, О.Баасанхүү нар байр сууриа өөрчлөхгүй гэдгээ мэдэгдсэн. Мөн УИХ дахь МАН-ын бүлэг Ерөнхий сайдыг огцруулах тогоолын төсөлд тусгасан үндэслэлүүдийг эргэн  харна гэснийг харахад тогтоолын төслийг дэмжсэн МАН-ын гишүүд  замын дундаас буцах магадлалтай.

Ирэх пүрэв гарагт МАН-ын бүлгийн ажлын тав хоногийн завсарлага өндөрлөж, Төрийн байгуулалтын байнгын хороо хуралдах учиртай. Энэ үеэр АН өмнөх шиг бүх гишүүдээ бүтэн ирцээр нь хуралдаанд оруулах биз. Харин тогтоолын төслийг санаачлагч болон дэмжигч гишүүдийн байр суурь хэвээр хадгалагдах эсэх нь тодорхойгүй байна.     

Ерөнхий сайдыг огцруулах нь Шийдлийн засгийн газрыг тараах эрсдэлтэй. Иймд АН энэ асуудлыг нэг тийш шийдсэний дараа л ҮЗХ-оо хуралдуулахаар хойшлуулаад байна.