Өнөөдөр УИХ-ын нэгдсэн хуралдаанаар дараах хоёр чухал асуудлыг хэлэлцэнэ.  Эдгээр нь,

• Иргэний хуульд нэмэлт оруулах тухай болон Үл хөдлөх эд хөрөнгийн барьцааны тухай хуульд өөрчлөлт оруулах тухай хуулийн төслүүд
• “Гацууртын  ордын төрийн эзэмшлийн хувь тогтоох тухай” УИХ-ын тогтоолын төсөл юм.

УИХ-ын гишүүн Д.Ганбат нарын 27 гишүүн энэ сарын 08-нд Иргэний хуульд нэмэлт оруулах тухай болон Үл хөдлөх эд хөрөнгийн барьцааны тухай хуулийг өргөн барьсан. Өнөөдөр эдгээр төслийг хэлэлцэх эсэхийг шийдвэрлэнэ. Хууль санаачлагчийн илтгэлийг УИХ-ын гишүүн Д.ГАНБАТ, Хууль зүйн байнгын хорооны санал, дүгнэлтийг Улсын Их Хурлын гишүүн Ц.ОЮУНГЭРЭЛ танилцуулна. Нэр дурдсан хуулиудад өөрчлөлт оруулснаар арилжааны банкууд ипотекийн зээлийг үргэлжлүүлэн олгохын сацуу зээлийн хүү ч буурах нөхцөл бүрдэх юм. 

“Гацууртын ордын төрийн эзэмшлийн хувь тогтоох тухай” УИХ-ын тогтоолын төслийг Засгийн газраас 2015.10.23-ны өдөр өргөн мэдүүлсэн. Өнөөдөр энэ төслийн анхны хэлэлцүүлэг болох юм. Эдийн засгийн байнгын хорооны санал, дүгнэлтийг Улсын Их Хурлын гишүүн Д.ГАНХУЯГ танилцуулна.

Ингэснээр УИХ Гацууртын асуудлыг гурав дахь удаа, он дамнан хэлэлцэж байна.