Дэлхий дахинд Монгол Улсын нэрийг өндөрт өргөн олон улсын тэмцээн, уралдаанд үнэмлэхүй амжилт гаргасан монголчуудыг Монгол Улсын Соёлын элчээр томилох болсон.

Тэгвэл үүнтэй холбогдуулан МУГЖ, дуурийн дуучин Г.Ариунбаатарыг Монгол Улсын Соёлын элчээр томилж, УИХ-ын дарга З.Энхболд гэрчилгээг гардуулан өгчээ.

УИХ-ын дарга З.Энхболд Монгол Улсын Соёлын элчийн гэрчилгээг гардуулж хэлсэн үгэндээ эх орныхоо нэрийг олон улсад сайн, сайхнаар цуурайтуулж байгаа авьяаслаг монгол залуучуудаараа бахархаж байна гээд эдгээр авьяастнуудаа Монгол Улсыг гадаадад сурталчлах бодлогын үйл ажиллагаанд татан оролцуулах, соёлын харилцааг идэвхижүүлэх, хөгжүүлэх чиглэлээр гаргаж буй тэдний санал, санаачлагыг дэмжин ажиллахын чухлыг онцлов.

Гавьяат жүжигчин Г.Ариунбаатар Монгол Улсын Соёлын элчээр ажиллах хугацаандаа эх орноо гадаадын улс орнуудад сурталчлан таниулах үйл ажиллагааг идэвхтэй явуулж бусад улстай соёлын гадаад харилцааг өргөжүүлэн хөгжүүлэх чиглэлээр ГХЯ-тай хамтран ажиллах юм байна.