УИХ-ын чуулганы пүрэв гаригийн нэгдсэн хуралдаан эхэллээ.

Чуулганаар хэлэлцэх асуудлын долоодугаарт Засгийн газраас өргөн мэдүүлсэн “Гацууртын ордын төрийн эзэмшлийн хувь тогтоох тухай” Улсын Их Хурлын тогтоолын төслийг хэлэлцэх, эсэх тухай байв. Тус ордын төрийн эзэмшлийн хувь хэмжээг 34 хувь байхаар төсөлд тусгасныг УИХ дахь “Шударга ёс” эвслийн бүлгийн гишүүд ярилцах хэрэгтэй хэмээн үзэж, тав хоногийн завсарлага авах санал гаргасныг УИХ-ын дарга З.Энхболд ёсоор болголоо.

Мөн тус бүлгээс “Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” Улсын Их Хурлын тогтоолын төслийг нухацтай ярилцах шаардлагатай хэмээн үзэж тав хоногийн завсарлага авлаа.

Монгол Улсын Ерөнхийлөгчийн арваннэгдүгээр сарын 19-ний өдөр өргөн мэдүүлсэн энэ төсөлтэй холбогдуулсан тус бүлгийн гишүүд Ерөнхийлөгчийн хуулийн бодлогын зөвлөх Ч.Өнөрбаяраас мэдээлэл авах хүсэлтээ хэд хэдэн удаа тавьсан боловч хариу өгөөгүй гэж УИХ-ын гишүүн З.Баянсэлэнгэ тайлбарлав.