УИХ-ын шинэ долоо хоногийн үйл ажиллагааны өнөөдрийн хуваарийг танилцуулж байна. Хуваарийг УИХ-ын даргын дэргэдэх Зөвлөлийн 2015.12.04-ний өдрийн хурлаар баталжээ.

АЖЛЫН ХЭСГИЙН ХУРАЛДААН

•Барилгын тухай /шинэчилсэн найруулга/ болон холбогдох бусад хуулийн төслүүдийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын хэсгийн хуралдаан 10.00 цагаас “Г” танхимд;
•“Юмжаагийн Цэдэнбалын мэндэлсний 100 жилийн ойг тэмдэглэн өнгөрүүлэх тухай” Улсын Их Хурлын тогтоолын төслийг хэлэлцүүлэгт бэлтгэх үүрэг бүхий Төрийн байгуулалтын байнгын хорооны ажлын хэсгийн хуралдаан 14.00 цагаас 334 тоот өрөөнд;
•Олон улсын зах зээлд гаргасан, Засгийн газрын үнэт цаасны арилжаагаар төвлөрсөн хөрөнгийн зарцуулалт, эргэн төлөлт болон санхүүжүүлсэн төсөл хөтөлбөрийн сонголт, хэрэгжилтийн явц байдлыг шалгасан Эдийн засгийн болон Төсвийн байнгын хорооны хамтарсан ажлын хэсгийн хуралдаан 14.00 цагаас “А” танхимд.

Эдгээрээс хоёр байнгын хорооны хамтарсан ажлын хэсгийн хуралдаан анхаарал татаж байгаа юм. УИХ-ын даргын захирамжаар байгуулагдсан энэ ажлын хэсгийг УИХ-ын гишүүн Л.Энх-Амгалан даргалдаг.

АН болон МАН-ын гишүүдээс бүрдсэн энэ ажлын хэсэг Хөгжлийн банкнаас олон улсын зах зээлд гарган, Засгийн газрын үнэт цаасны арилжаагаар төвлөрсөн хөрөнгийн зарцуулалтыг хянасан юм. Товчоор хэлбэл Хөгжлийн банкаар дамжуулан зарцуулсан, бондын хөрөнгийн эргэн төлөлтөд шалгалт явуулсан. Гэвч өнөөг хүртэл ажлын хэсгийн дүгнэлтээ албан ёсоор гаргаж чадаагүй байна.