Бразилийн Рио-де-Жанейро хотноо зуны олимпийн XXXI дэх наадам эхлэхэд 253 хоног үлдлээ.

Өнөөдрийн байдлаар "Рио-2016" олимпийн наадмын эрхийг 11 тамирчин хүртээд байна.

Монголын жүдо бөхийн шигшээ багийн тамирчид олимпийн эрхийн чансаагаа цуглуулсаар байна. Рио-2016-д жүдочид бүтэн багаараа буюу эрэгтэй, эмэгтэй тус бүр долоон жинд эрхээ авахыг зорьж байгаа.

Ширэн бээлийтнүүдийн хувьд өнгөрсөн сард Дохагийн ДАШТ-ээс медальгүй, олимпийн эрхгүй ирсэн. Гэхдээ олимпийн эрх олгох хоёр ч тэмцээн үлдээд буй. 

Олимпийн эрх хүртээд буй тамирчдын талаарх мэдээллийг хүргэе.

БУУДЛАГА

• Отрядын Гүндэгмаа-БНСУ-д зохиогдсон "Дэлхийн цом"-ын аварга шалгаруулах тэмцээний спорт гар бууны дасгалд алтан медаль хүртэж “Рио 2016” олимпийн наадамд оролцох Монгол Улсын анхны эрхийг эх орондоо авчирсан.

• Ганхуягийн Нандинзаяа-АНУ-д зохиогдсон "Дэлхийн цом"-ын аварга шалгаруулах тэмцээний хийн урт бууны 10 метрийн дасгалд IY байрт шалгарсан.

• Цогбадрахын Мөнхзул-Азербайжан улсын Габала хотноо  Дэлхийн цомын аварга шалгаруулах тэмцээний спорт гар бууны 25 метрийн дасгалд YI байрт шалгарсан.

ХӨНГӨН АТЛЕТИК

• Бат-Очирын Сэр-Од-Герман улсын Хамбург хотноо XXX дахь удаагийн “Хамбург марафон” тэмцээнд YI байрт шалгарсан.

ЧӨЛӨӨТ БӨХ

• Соронзонболдын Батцэцэг- АНУ-ын Лас Вегаст болсон чөлөөт бөхийн ДАШТ-ий 63кг-д түрүүлж олимпийн эрхээ авсан.

• Пүрэвжавын Өнөрбат- АНУ-ын Лас Вегаст болсон чөлөөт бөхийн ДАШТ-ий 74кг-д мөнгөн медаль хүртсэн.

• Эрдэнэбатын Бэхбаяр- АНУ-ын Лас Вегаст болсон чөлөөт бөхийн ДАШТ-ий 57 кг-д хүрэл медаль хүртсэн.

• Очирбатын Насанбурмаа- АНУ-ын Лас Вегаст болсон чөлөөт бөхийн ДАШТ-ий 69кг-д шагналт V байрт орсон.

• 

• Ганзоригийн Мандахнаран-АНУ-ын Лас Вегаст болсон чөлөөт бөхийн ДАШТ-ий 65кг-д шагналт V байрт орсон.

• Жаргалсайханы Чулуунбат-АНУ-ын Лас Вегаст болсон чөлөөт бөхийн ДАШТ-ий 120кг-д шагналт V байрт шалгарч эрхээ хүртсэн

БАЙТ ХАРВАА

• Жанцангийн Гантөгс-Тайланд улсын Банкгог хотноо зохиогдсон Азийн аварга шалгаруулах тэмцээний ганцаарчилсан харваанд II байрт шалгарсан.