Ерөнхий сайд Ч.Сайханбилэг өнөөдөр УИХ-ын чуулганы нэгдсэн хуралдаанд 2015-2016 оны өвөлжилтийн бэлтгэлийг хангах ажлын явцын талаар танилцууллаа.

Тэрээр “Дэлхий даяар уур амьсгалын өөрчлөлт эрчимтэй явагдаж байна. Олон жилийн цаг агаарын хандлагаас харахад бичин жил ХАА, ялангуяа МАА-н өвөлжилтөнд хүндрэл учруулж ирсэн. Энэ бүхнийг харгалзан Засгийн газраас өвөлжилтийн бэлтгэлийг хангахад онцгой анхаарч байна.

Засгийн газар 2015.07.07-ны өдрийн хуралдаанаар 2015-2016 оны өвөлжилтийн бэлтгэлийг хангах зарим арга хэмжээний асуудлыг хэлэлцсэн. “Төв, суурин газрын 2015-2016 оны өвөлжилтийн бэлтгэл ажлыг хангах зарим арга хэмжээний тухай” 293 дугаар тогтоолыг баталлаа.

Өвөлжилтийн бэлтгэл ажлыг ханган, хэрэгжүүлэх ажлыг бүх шатанд эрчимтэй зохион байгуулан ажиллаж байна. УЦУЭШХ-гийн мэдээллээс үзвэл энэ намар, өвлийн эхний сарын цаг агаарын байдал тогтвортой бус байна.

Ялангуяа арванхоёрдугаар сард нутгийн ихэнх хэсэгт олон жилийн дунджаас ахиу цас орно. Иймд малчид хадлан тэжээл бэлтгэх, татаж байршуулах, отор нүүдлийг яаралтай зохион байгуулах нь зүйтэй гэсэн  сэрэмжлүүлэг гаргаж, орон нутгийн засаг захиргаа болон олон нийтэд хүргүүлсэн” гэсэн юм.