Аж үйлдвэрийн сайд Д.Эрдэнэбат энэ сарын 17-нд БНХАУ-ын Худалдааны эд сайд Гао Яньтайтай Бээжин хотноо уулзлаа. Талууд “Монгол-Хятадын үйлдвэрлэгч, худалдаалагчдын экспо” үзэсгэлэн яармагийг ирэх сарын 23-27-ны өдрүүдэд ӨМӨЗО-ны Хөх хотод хамтран зохион байгуулахаар болов. 

Үзэсгэлэн яармагт Хятадын талаас 49.000 м2 талбай, 70 сая юанын санхүүжилт гаргаж, хоёр улсын үйлдвэрлэгч, худалдааны компанийн  10 мянга  гаруй төлөөлөгчийг  оролцуулахаар төлөвлөжээ. Цаашид үзэсгэлэн яармагийг  хоёр жилд нэг удаа талууд ээлжлэн зохион байгуулахаар Хятадын тал төлөвлөж байгаа аж.

Уулзалтаар үзэсгэлэн яармагт хоёр талын төлөөллийг өргөнөөр оролцуулах, зохион байгуулалтыг орон нутгийн төрийн захиргааны байгууллагууд болон худалдааны танхимуудаар дамжуулан хэрэгжүүлэх, Монгол Улсын Аж үйлдвэрийн яам, БНХАУ-ын Худалдааны яам ерөнхий зохион байгуулагч байхаар санамж бичиг байгуулахаар тохиролцож, санал солилцов. 

Энэ экспог тогтмол зохион байгуулснаар манай үйлдвэрлэгчид  бүтээгдэхүүн, үйлчилгээгээ Хятадын зах зээлд гаргах боломж нээгдэнэ.

Үүнээс гадна талууд гурван улсын эдийн засгийн хонгил байгуулах ажлын хүрээнд Монголд зэсийн баяжмал хайлуулах, цэвэршүүлэх үйлдвэр, БНХАУ-тай хил залгаа аймгуудад мах боловсруулах үйлдвэр байгуулахад хамтран ажиллах, хөрөнгө оруулалт хийх, боловсруулсан бүтээгдэхүүнээ БНХАУ-д экспортлоход дэмжлэг үзүүлж ажиллах талаар хэлэлцэв.

Мөн хил дамнасан эдийн засгийн чөлөөт бүс байгуулах ажлыг эрчимжүүлэхээр хоёр талын ажлын хэсгийг ажиллуулах, тулгамдаж буй асуудлуудыг ажлын хэсгүүдийн хурлаар шийдвэрлэх талаар ч ярилцсан.

Улаанбаатар хотод ирэх сарын 15-нд “Монголд үйлдвэрлэв” аж үйлдвэрийн форум болно. Форумд БНХАУ-ын төрийн байгууллага болон компаниудын төлөөллийг оролцуулахыг урьлаа гэж Аж үйлдвэрийн яамнаас мэдээлэв.