Хэрэв та гэрэл зурагчин эсвэл гэрэл зураг сонирхогч бол "Бидний тусгал" нэртэй үзэсгэлэнгээр ороод гарахыг зөвлөе.

"Тусгал" гэрэл зураг сонирхогчдын бүлгийн үүсгэн байгуулсны таван жилийн ойн баярыг угтан энэ үзэсгэлэнг зохион байгуулж байгаа аж.

"Бидний тусгал" үзэсгэлэн нь Занабазарын нэрэмжит дүрслэх урлагийн музейд 2015 оны есдүгээр сарын 12-ноос 18-ныг дуустал үнэ төлбөргүй олон нийтэд хүрнэ.

Бид "Тусгал" гэрэл зураг сонирхогчдын бүлгийн гишүүн Д.Учралаас үзэсгэлэнгийн талаар тодрууллаа.

-Тусгал гэрэл зураг сонирхогчдын бүлгийг анх байгуулсан талаараа ярихгүй юу?
-Бид анх Бизнетворк хэмээх вебсайтад гэрэл зураг сонирхогчдын групп үүсгээд улмаар анхны аяллаа 2010 оны есдүгээр сарын 11-нд хийж байлаа. Тэр аяллаас хойш "Тусгал" хэмээх бүлэг маань байгуулагдсан. Одоогийн байдлаар 55 гишүүнтэй болтлоо өргөжөөд байна.

Бүлэг маань байгуулагдаад таван жилийн нүүрийг үзэж байна. Бид ойн баяртаа зориулж өнгөрсөн хугацаанд авсан гэрэл зургуудаараа үзэсгэлэн гаргалаа.

-"Ам бүл" нь өргөжөөд хэдийнэ 55-уулаа болчихсон байна. Танай бүлэгт ямар шалгуураар элсдэг юм бэ?
-Манайх "Хамтдаа хөгжицгөөе" хэмээх нэг нэгэндээ мэдэхгүй юмаа зааж зөвлөх зорилготой үйл ажиллагааг олон удаа зохион байгуулаад байна. Цаашид зохион байгуулна. Энэ төрлийн үйл ажиллагаанд гурван удаа оролцсон байхад манай бүлэгт гишүүнээр элсэх боломжтой болдог.

Манай бүлгийн гишүүн болсноор гэрэл зургийн тал дээр мэргэжлийн зөвлөгөө авах, үйл ажиллагаануудыг биечлэн зохион байгуулж, оролцох мөн шинэ зүйлс сурч мэдэх зэрэг олон давуу талтай.

-Эдгээр үйл ажиллагааны талаарх мэдээллийг хаанаас авах вэ?
-Фэйсбүүкт Тусгал Гэрэл зураг сонирхогчдын нээлттэй групп гээд байгаа мөн фэйсбүүк дэх Тусгал гэсэн фэйжээс үйл ажиллагаануудын талаарх мэдээлэлүүдийг авах боломжтой.

-Энэ удаагийн үзэсгэлэнгийн онцлог нь юу байна?
-Энэ үзэсгэлэн маань есдүгээр сарын 18-ны 18.00 цаг хүртэл нээлттэй байна. Цаашид бид үзэсгэлэнгээ өөр өөр газруудад гаргах төлөвлөгөөтэй байна. Жишээ нь, Богд уулан дээр ч юм уу. Энгийн мөртлөө олон хүнд хүртээмжтэй газруудад үзэсгэлэнгээ гаргахаар төлөвлөж байна.

Мөн “Бидний тусгал” үзэсгэлэн маань "Амьдрал бол аялал" гэсэн уриатай болж байна.  Манай 55 гишүүний дийлэнх нь байгалийн зураг авдаг. Тиймээс бид зочдод аялалд явж байгаа юм шиг сэтгэгдэл төрүүлэх үүднээс үзэсгэлэнгийнхээ голд майхан засч, аяны сандал, тулган дээрх тогоо гэх мэт содон зүйлсийг байрлуулаад бяцхан аяллын булан хийсэн.

Энд та айраг ууж, тухлах боломжтой. Мөн зарим зургийн агууламжийг илүү бодитой болгохын тулд урд нь янз бүрийн зүйлс байрлуулсан. Жишээ нь, сүү самарч байгаа зурагны урд аягатай сүү, цагаан идээ зэргийг тавьсан.

-Дараа дараагийн үзэсгэлэнд нь амжилт хүсье.

Тэд удахгүй “Монголын Фликрчид” ТББ-тай хамтран дөрөв дэхь жилдээ "Мартагдашгүй намар" хэмээх аяллыг зохион байгуулах гэж байна. Энэ аялал нь тариан талбай дээр очиж намрын ургац хураалтын зураг авах, тариачдад туслах мөн нэг нэгэндээ зааж зөвлөх мэдэхгүй зүйлээ суралцах боломжтой гэдгээрээ онцлог юм. Та энэ аялалд явахын тулд заавал бүлгийн гишүүн байх шаардлагагүй юм байна.

Энэ үзэсгэлэн дуусахад ердөө хоёрхон хоног үлдсэн тул та амжиж зочлоорой