Өргөн хэрэглээний бараа, тэр дундаа хүнсний гол нэрийн бүтээгдэхүүн, мах ногооны үнэ өсөж, буурах нь иргэдийн амьдралд шууд нөлөөлдөг. Ялангуяа уур амьсгалын өөрчлөлт нэмэгдсэн энэ үед ургац хураалт, тариалалт, хадгалалтын хэмжээнээс шалтгаалж хүнсний ногооны үнэ байнга хэлбэлздэг билээ.

Манай улс төмсөө дотоодоос бүрэн хангах чадалтай ч байцаа, сонгино зэрэг зарим ногоог зайлшгүй гадаадаас импортлох шаардлага тулгардаг. Тиймээс ч валютын ханшны өсөлт ногооны үнэд давхар нөлөөлж байдаг.

Тэгвэл өргөн хэрэглээний хүнсний ногоо буюу төмс, лууван, сонгино, сармис, байцайн үнэ сүүлийн таван жилд (2016 оны нэгдүгээр сараас өнөөдрийн хүртэл) хэрхэн өөрчлөгдсөнийг графикаар хүргэж байна. /Үнийн мэдээллийг Үндэсний статистикийн хорооноос авав/

БАЙЦАА

Импортын байцайн нэг кг-ын дундаж үнэ 2020 оны долоодугаар сард дээд хэмжээндээ буюу 2738 төгрөгт хүрчээ. Харин 2016 оны арваннэгдүгээр сард доод үнэ болох 921 төгрөгт хүрсэн байна.

2019 оны арваннэгдүгээр сараас энэ оны долоодугаар сарыг хүртэл тогтмол өссөөр байсан байцайн үнэ наймдугаар сард 1595 төгрөг болж 42 хувиар буурсан байна. Графикаас харахад байцайн үнэ жил бүрийн өвөл (Аравдугаар сараас дараа жилийнх нь хоёрдугаар сар хүртэл) буурч, зун намар (Зургаадугаар сараас есдүгээр сар хүртэл) нэмэгддэг нь ажиглагдав.

ЛУУВАН

Импортын луувангийн нэг кг-ын дундаж үнэ 2018 оны долоодугаар сард дээд хэмжээ буюу 2625 төгрөгт хүрчээ. Харин 2017 оны зургаадугаар сард доод хэмжээ болох 824 төгрөгт хүрсэн байна.

2019 оны арваннэгдүгээр сараас энэ оны долоодугаар сар хүртэл тогтмол өссөөр байсан үнэ нь наймдугаар сард 13 хувиар буурч 2010 төгрөг болжээ. Графикаас харахад байцайтай адил жил бүрийн өвөл үнэ буурч зун намар нэмэгддэг аж.

СОНГИНО

БНХАУ-аас импортлон оруулж ирдэг сонгинын нэг кг-ын дундаж үнэ 2020 оны долоодугаар сард дээд хэмжээ болох 1691 төгрөгт хүрсэн байна. Харин 2016 оны аравдугаар сард доод хэмжээ буюу 1120 төгрөгт хүрчээ. 

2019 оны арваннэгдүгээр сараас энэ оны долоодугаар сар хүртэл тогтмол өссөөр байсан сонгинын үнэ энэ оны наймдугаар сард 7 хувиар буурч 1576 төгрөг болсон байна. Графикаас ажиглахад үнэ нь жил бүрийн өвөл буурч, зун намар нэмэгддэг аж.

САРМИС

БНХАУ-аас импортолдог сармисны нэг булцууны дундаж үнэ 2018 оны долоодугаар сард дээд хэмжээ буюу 546 төгрөгт хүрсэн. Харин 2016 оны аравдугаар сард доод хэмжээ болох 379 төгрөг болжээ.

2019 оны наймдугаар сараас энэ оны зургаадугаар сар хүртэл тогтмол өссөөр байсан сармисны үнэ энэ оны долоодугаар сараас буурсаар өнгөрсөн сарын байдлаар 491 төгрөгт хүрсэн байна.

Сармисны үнэ графикаас ажиглавал 2016 оны нэгдүгээр сараас 2018 оны зун хүртэл тогтмол өссөн ч тухайн жилийн намраас 2019 оны арваннэгдүгээр сар хүртэл буурчээ.

ТӨМС

Дотоодоос хэрэгцээгээ хангадаг төмсний нэг кг-ын дундаж үнэ 2020 оны долоодугаар сард дээд хэмжээ буюу 1972 төгрөгт хүрсэн. Харин 2017 оны зургаадугаар сард доод хэмжээ болох 660 төгрөгт хүрч байв.

2019 оны арваннэгдүгээр сараас энэ оны долоодугаар сар хүртэл тогтмол өссөөр байсан төмсний үнэ наймдугаар сард 36 хувиар буурч 1266 төгрөг болсон байна. Графикаас харахад үнэ нь жил бүрийн өвөл буурч, зун намар нэмэгддэг аж.

Инфографикийг бэлтгэсэн Д.Жавхлантөгс