Тайландын Пхукет хотноо болж буй хүндийг өргөлтийн насанд хүрэгчдийн Ази тивийн аварга шалгаруулах тэмцээний эрэгтэйчүүдийн 85кг-ийн жинд Баян-Өлгий аймгийн Өлгий хотод төрж өссөн Өмиртайн Ермек түрүүлэв.

Казахстаны шигшээ багийн гишүүн Ө.Ермек огцом өргөлтөөр 161 кг, түлхэлттэй өргөлтөөр 203 кг, нийлбэр дүнгээр 364 кг-ийг өргөж Азийн аварга боллоо.

Ө.Ермек нь 1992 онд Баян-Өлгий аймагт төрсөн. Тэрээр 1960-70-аад Монгол Улсын дээд амжилтыг олон удаа тогтоож улсын аварга болж явсан нэрт туйванч Даривхааны ач хүү юм.

Тэрээр 2011 онд өсвөр үеийнхний Азийн аварга шалгаруулах тэмцээнээс хүрэл медаль хүртсэн, Казахстан улсын спортын мастер цолтой өсөх ирээдүйтэй тамирчин.