Өнөөдөр эрхлэн наадахыг л мэдэх энхрий бяцхан зургаан настнуудын эрдмийн далайд хөл тавих эхний өдөр.

Өнөөдөр сурагчийн ширээнээ тохой залган сууж, эрх танхи зангаар дэггүйтэн гүйж явсан хүүхэд нас ард хоцорч оюуны оргил өөд мацах гарааны өдөр.

Өнөөдөр хүүхэд шуугиулсан их өргөөний эзэн, амьдрал хэмээх хөлгүй далайд залуурч болсон багш нарын баярын өдөр.

Өнөөдөр сурагчийн хувцас, оюутан цагийн мартагдашгүй өдрүүдээ санагалзан догдлох хэн бүхний баярын өдөр.

Энэ өдөр Ерөнхий боловсролын сургуульд 64364 зургаан настан сурагчийн хувцсаар гангарах юм. Мөн 2015-2016 оны хичээлийн жилд нийт 799 сургуульд 539818 сурагч эрдмийн мөр хөөх ажээ.

Харин 99 их, дээд сургууль, коллежид нийт 170 мянган оюутан суралцана гэсэн тооцоо гаргасан байна.

5690 суудал бүхий 14 сургууль, 5820 ор бүхий 47 цэцэрлэг, 2460 суудал, 1440 ор бүхий 13 бага сургууль, цэцэрлэгийн цогцолбор, 920 ор бүхий есөн дотуур байр, долоон спорт заал энэ онд шинээр ашиглалтад орно.

Эрдмийн их өргөөнөө алхан орсон эдгээр хүүхэд, залуус минь ухаант мэргэн багш нараасаа суралцаж амьдрал өөд тэмүүлэн тэмцэх мэдлэг, их төлөвшлийг олж амьдралд хөл тавих учиртай.

Та бүхнийхээ оюуны эрэлд мордох энэхүү үйлст амжилт хүсэж, хичээлийн шинэ жилийн баярын мэнд хүргэе!