“Ээлжит бус чуулган зарласан ч Ерөнхий сайд зургаан сайдын нэрийг оруулж ирэх боломжгүй байна. Ирэх намрын чуулганд оруулна” гэж Ерөнхий сайдын хэвлэлийн төлөөлөгч өчигдөр мэдэгдлээ.

Хэвлэлийн төлөөлөгчийн тайлбарласнаар Ерөнхий сайд ойрын үед сайд нарыг томилох ээлжит бус чуулганд оролцох завгүй ийш тийш ажлаар явна гэсэн юм. Үүгээр бол аравдугаар сарын 1-нийг хүртэл МАН-ын “үлдээсэн” яамд сайдгүй ажиллаж таарч байгаа юм. Өөрөөр хэлбэл, энэ хугацаанд АН дангаар засаглана гэсэн үг.

Гэхдээ энэ мэдэгдлийн дараа буюу үдээс хойш нь АН-ын Гүйцэтгэх зөвлөл яаралтай хуралдаж ээлжит бус чуулганаар хэлэлцэх сайд нарын томилгоо, Ерөнхийлөгчийн хоригийн талаар хэлэлцжээ. Гүйцэтгэх зөвлөлөөс сайд нарынхаа нэрийг нэг мөр болгож, ойрын үед ээлжит бус чуулган зарлан дээрх хоёр асуудлыг шийдэхээр санал нэгдсэн гэх мэдээлэл байна.

Дашрамд хэлэхэд, сүүлийн өдрүүдэд“... Ерөнхий сайдын санал болгосон сайд нарыг нам нь хүлээн зөвшөөрөхгүй, намынхыгаа Ерөнхий сайд зөвшөөрөхгүй байгаа учраас сайд нарын томилгоо удааширсан” хэмээн хэвлэлүүд мэдээлж байгаа юм.

Б.Дамдин