Ардчилсан нам, Монгол ардын намтай байгуулсан гэрээгээ цуцалсан учраас засагт ажиллаж байсан МАН-ын 6 сайд, 7 дэд сайд огцорсон. Сайд нарын асуудлыг аравдугаар сард эхлэх УИХ-ын ээлжит чуулганаар хэлэлцэх болсныг Ерөнхий сайдын хэвлэл мэдээлэл хариуцсан зөвлөх Ц.Мөнхтөр мэдээллээ.

“МАН-ын 6 сайдыг УИХ-аас чөлөөлснөөс хойш Ерөнхий сайд наймдугаар сарын 7-нд үүрэг гүйцэтгүүлэх тухай тушаал гаргаж, 6 сайдын ажлыг Засгийн газрын гишүүд орлон ажиллаж байна.

Цаг үеийн нөхцөл байдлаас шалтгаалж, дараагийн сайдуудыг томилох асуудлыг хэлэлцсэн боловч цаг үеийн нөхцөл байдал, улс төрийн намуудтай харилцан ойлголцох асуудал байгаа учраас энэ асуудлыг түр хойш нь тавиад УИХ-ын намрын ээлжит чуулганаар өргөн барих нь зүйтэй гэж Ерөнхий сайд үзэж байна.

Ээлжит бус чуулган хуралдах эсэх нь УИХ-ын мэдлийн хэрэг. Ерөнхийлөгчийн хоригийг авч хэлэлцэх асуудлаар ээлжит бус чуулган хуралдсан ч Ерөнхий сайд 6 сайдын асуудлаар хандах боломжгүй. Тиймээс аравдугаар сард эхлэх намрын чуулганаар өргөн барья гэсэн шийдвэр гаргалаа” гэв.

Хичээлийн шинэ жил, ургац хураалт, өвөлжилтийн бэлтгэл зэрэг олон асуудалд энэ чиглэлийн яамд өөрсдийн үүргийг сайн гүйцэтгэж, Засгийн газрын хуралдаан тогтмол хуралдаж шийдвэрээ гаргаж байгаа учир ажил цалгардсан зүйлгүй гэдгийг тэрээр нэмж хэллээ.

Ерөнхий сайд ирэх долоо хоногийн сүүлчээр газар тариалангийн бүс нутгаар ажиллах, эдийн засгийн томоохон шийдвэр гаргах ажлууд байгаа учраас сандал ширээний асуудал ярихаас илүү эдийн засгийг эрчимжүүлэх болон бусад асуудлаар шуурхай ажиллах нь зүйтэй гэж үзжээ.

Гэрэл зургийг Б.Бямба-Очир / MPA.mn