Өнгөрсөн амралтын өдрүүдэд Хонконгт явагдсан Ой тогтоолтын Ази тивийн аварга шалгаруулах оюуны спортын тэмцээнд манай тамирчид 37 медаль хүртэж тэргүүлжээ.

Тус тэмцээнд нийт 13 улсын 119 тамирчин ой тогтоолтын 10 төрлөөр бага, өсвөр, насанд хүрэгчдийн ангилалд оюун ухаан, сэтгэн бодох чадвараараа өрсөлдсөн байна. Манай улсыг төлөөлж Монголын оюун ухааны академийн 20 тамирчин багш, дасгалжуулагчийн хамт Хонконгийг зорьсон бөгөөд авах боломжит 63 медалиас 37 медаль хүртжээ.

Тодруулбал, 14 алт, 13 мөнгө, 10 хүрэл медаль хүртсэн байна.

Тэмцээний 10 төрлийн нийлбэр оноогоор ой тогтоолтын олон улсын их мастер Ө.Сэнгэсамдан 6 алт, 2 мөнгөн медаль хүртэж Ази тивийн аварга болсон бөгөөд тус тэмцээнд авсан 7141 оноогоор Дэлхийн чансаанд 3000 гаруй тамирчдаас 5 дугаарт бичигдсэн амжилт үзүүлжээ.

Өсвөр насны ангилалд нийлбэр дүнгээр эхний 3 байрыг их мастер Э.Пүрэвжав, Өсвөрийн дэлхийн аварга Э.Энхмөнх, Өсвөрийн дэлхийн аваргын мөнгөн медальт З.Цэцэгзул мөн бага насны ангилалд Н.Намуундарь дэд байрыг эзэллээ.

Тус тэмцээний өсвөр насны ангилалд их мастер Э.Пүрэвжав “Хоёртын тоолол” болон “30 минутын Хөзөр” төрөлд урьд өмнө манай тамирчдын эзэмшиж байсан Дэлхийн Рекордыг шинэчлэн тогтоолоо.

Мөн манай тамирчдаас Ө.Сэнгэсамдан, А.Анударь, Б.Шижир-Эрдэнэ, Э.Энхмөнх, З.Цэцэгзул, Э.Пүрэвжав нар Азийн Мастер цолны болзлыг хангажээ.

Зургийн эх сурвалж: Khatanbaatar Khandsuren фэйсбүүк хуудас