Монголын Залуучуудын холбоо Төрийн орон сууцны корпорацитай хамтран залуустаа сонгон шалгаруулах журмаар Буянт-Ухаа 2 хороололд зах зээлийн үнээс доогуур үнээр 50 айлын орон сууц хуваарилахаар болжээ.

Үүнтэй холбогдуулан өнөөдөр МЗХ-ны төлөөлөл Төрийн орон сууцны корпарацитай хамтран ажиллах санамж бичигт ТОСК-ын тэргүүн дэд захирал Д.Алтанхуяг болон Монголын залуучуудын холбооны Удирдлага хамтын ажиллагааны газрын дарга Б.Эрдэнэбат нар  гарын үсэг зурлаа.

Энэ орон сууц 2-3 өрөө байх бөгөөд метр кв нь ойролцоогоор 1.35 сая төгрөгөөр худалдаалахаар судалж байна гэж ТОСК-ын тэргүүн дэд захирал Д.Алтанхуяг хэллээ. Орон сууц ашиглалтанд ороогүй учраас үнэ нь эцсийн байдлаар гараагүй байгаа гэнэ.

Буянт-Ухаа-2 хороолол нь нэг орцондоо 54 айлтай орон сууцны 48 барилгыг 2014 оны зургаадугаар сард эхэлжээ. Энэ 48 барилгаас эхний 22 барилгыг 2015 оны аравдугаар сарын 30-нд ашиглалтанд оруулахаар төлөвлөж байсан ч үүн дээр найман барилга нэмж ашиглалтанд оруулахаар төлөвлөж байгаа гэнэ.

ТОСК, МЗХ-той хамтарсан гэрээ байгуулахдаа ашиглалтанд орох 1500 айлын орон сууцнаас 50 айлын орон сууцыг эхний ээлжинд хуваарилж өгөхөөр ажиллаж байна. Цаашдаа 1000 айлын орон сууц хөтөлбөрийн хүрээнд аймгуудад баригдаж буй орон сууцнаас залуучуудад олгохоор ажиллаж байна гэлээ.

Энэ жил жижиг дунд үйлдвэрлэл, хувиараа бизнес эрхэлдэг, манай нийгмийн аль ч давхаргад ажиллаж амьдарч буй хүмүүсийг блгдийг хамруулахыг зорьж байгаа ч зах зээлд нийлүүлж буй байрны эрэлт хэрэгцээ хангаж гүйцэхгүй. Гэхдээ  тодорхой хэмжээний квот тогтоогоод сугалаа сугалах замаар орон сууцанд оруулна.

Зах зээлд худалдагдахгүй байгаа орон сууцыг хэрхэн борлуулах нь тухайн бизнесийн асуудал гэлээ.

МЗХ-ны Удирдлага хамтын ажиллагааны газрын дарга Б.Эрдэнэбат "Манай байгууллага 21 аймаг, есөн  дүүрэгт салбар нэгжтэй. Сайн ажиллаж буй, идэвх оролцоо сайтай, нийгмийн асуудлуудаа шийдвэрлүүлэх хүсэлтийг албан ёсоор МЗХ-д тавьсан залуучуудаа сонгон шалгаруулж байруудыг хуваарилах ажлыг бид зохион байгуулна" гэлээ.