МАХН-ын дарга Н.Энхбаяр өчигдөр “Шударга ёс эвсэл” бүлгийн хуралдаанд оролцсон. Харин  өнөөдөр Ардчилсан намын дарга З.Энхболдтой Төрийн ордонд уулзлаа.

Уулзалт 30 орчим минут үргэлжилсэн бөгөөд "Шударга ёс" эвслийн бүлгийн дарга Н.Батцэрэг, УИХ-ын гишүүн З.Баянсэлэнгэ нар түүнтэй хамт уулзалтад оржээ.

МАХН, МҮАН-ынхан "Шударга ёс" эвсэлд хамтраад Засгийн газрын суларсан орон тоонд боловсон хүчний бодлогоо хэрэгжүүлэх шаардлага байгааг Н.Энхбаяр ирсэн өдрөө хэлж байсан юм.

Уулзалтын өмнө тэрээр “Сайд нарын асуудлыг ярилцаж байна. Одоо дөнгөж яриа эхэлж байгаа учраас дэлгэрэнгүй мэдээлэл өгөх боломжгүй. Бид ч саналаа тодорхой гаргаагүй байна. Удахгүй тодорхой болно” гэлээ.

Монголбанкны дэд ерөнхийлөгчийн албыг хашдаг Н.Батшугар Шадар сайд болох магадлалтай хүмүүсийн тоонд орж байгаа юм. Өнөөдөр тэрээр аавтайгаа Төрийн ордонд хамт явж байсан  ч УИХ-ын дарга З.Энхболдтой хийсэн уулзалтад оролцоогүй аж.

Гэрэл зургийг Б.Бямба-Очир / MPA.mn