GoGo мэдээний агентлаг Монголын туялзуур сэлэмний холбоотой Хамтран ажиллах санамж бичигт өнөөдөр гарын үсэг зурлаа.

Ингэснээр бид туялзуур сэлэмний спортыг Монгол Улсад сурталчлах, Монголын туялзуур сэлэмний холбооны үйл ажиллагааг дэмжин ажиллах юм. GoGo.mn-ий баг хамгийн сүүлд Буянт-Ухаа спорт цогцолборт болсон, жудо бөхийн Чингис хаан Гран при тэмцээнийг газар дээрээс нь шууд дамжуулсан юм.   

Хамтын ажиллагааны хүрээнд ирэх сарын 7-12-ны өдрүүдэд Улаанбаатар хотод болох "Ulaanbaatar 2015" туялзуур сэлэмний залуучуудын Азийн аварга шалгаруулах тэмцээнийг шууд дамжуулахаар боллоо.

Энэ тэмцээнд Ази, Номхон далайн орнуудын 35 улсын 250 гаруй сэлэмчин оролцоно. Тэмцээнийг 16 улсын 19 шүүгч, техникийн ажилтнууд удирдан явуулах юм. Түүнчлэн энэ үеэр Улаанбаатар хотноо Азийн Туялзуур сэлэмний холбооны 2015 Ерөнхий Ассемблей болно. Хуралд Азийн 35 улсын туялзуур сэлэмний холбооны ерөнхийлөгч, хүндэт зочид оролцох юм.

Өнөөдрийн байдлаар 220 гаруй сэлэмчин тус тэмцээнд оролцох мэдүүлгээ ирүүлсэн бөгөөд “Ulaanbaatar 2015” залуучуудын Азийн аварга шалгаруулах тэмцээнд оролцох тамирчдын бүртгэл энэ сарын 17-ны өдрийг үргэлжлэнэ.

Ирэх сард зохион байгуулагдах уг тэмцээн Азийн Олимпийн Зөвлөлийн ерөнхийлөгч Шейх Ахмад Фахад Аль Сабахын нэрэмжит гэдгээрээ онцлогтой.

Мөн энэ онд 10 жилийнхээ ойг тэмдэглэж буй "Монгол Контент" компани ААШТ-ий ерөнхий ивээн тэтгэгчээр ажилллаж байгааг дуулгахад таатай байна.