Өчигдрийн Засгийн газрын хуралдаанаар Эрдэнэт-Овоотын төмөр замыг барих “Northern Railways” компанитай концессын гэрээ байгуулах тухай эрхийг Хөрөнгө оруулалтын газарт олгосон тухай Засгийн газрын тогтоол гарлаа.

Эрдэнэт хотоос Хөвсгөл аймгийн Цэцэрлэг суманд байрлах Овоот хүртэлх 547 км төмөр замын зураг төслийг боловсруулах, барих, ашиглах, шилжүүлэх гэсэн нөхцлөөр Хятад-Австралийн хамтарсан консорциум болох “Northern Railways” компанитай концессын гэрээ байгуулах эрхийг Хөрөнгө оруулалтын газарт олгосон гэж Ерөнхий сайдын хэвлэл мэдээлэл, олон нийттэй харилцах зөвлөх Ц.Мөнхтөр мэдээллээ.

Энэ нь Монголын баруун тийш явах томоохон төмөр замын ирээдүй хэтийн төлвийг тодорхойлсон зам болох бөгөөд цаашаагаа ОХУ-руу гарах боломж бүрдэх юм байна.

Төмөр замын  нийт өртөг нь 1,3 тэрбум ам.доллар. Энэ мөнгийг концесс эзэмшигч өөрийн хөрөнгөөс гаргаж барих гэнэ. Нийт 20 жилийн хугацаанд гаргасан зардлаа нөхнө гэсэн тооцоотой бөгөөд концесс эзэмшигч 30 жилийн хугацаатайгаар  гэрээ хийх юм байна.

30 жилийн дараа концесс эзэмшигч төмөр замын бүх суурь бүтцийг Монгол улсын Засгийн газарт хүлээлгэн өгөх гэнэ.

Цэцэрлэг сумын  уурхай нь 255 сая тонн коксжих нүүрстэй томоохон орд бөгөөд геологийн хайгуулаар энэ уурхайн нөөц нэмэгдэх боломжтой.

Монгол улс коксжих нүүрсний нөөцөөр  дэлхийд хоёрдугаарт бичигддэг. Энэхүү нүүрс нь ган хайлуулах үйлдвэрлэлд ашиглагддаг, дэлхийд өндөр үнэтэйд тооцогддог томоохон ашиглалт малтмал юм. Коксжих нүүрсийг сул нүүрстэй хольж хэрэглэх боломжтой гэдгээрээ давуу талтай.

Гэрэл зургийг: Б.Бямба-Очир /mpa.mn/