Нийслэлийн авто замын хөдөлгөөний ачааллыг бууруулах зорилгоор Нарны замыг 19-р хорооллын арын замтай холбох 1,5 км шинэ зам баригдаж байна.

Үндэсний соёл амралтын хүрээлэнгийн замын урд талын төмөр замын доогуурх туннелиэр хоёр урсгалтай зам тавьж байгаа бөгөөд энэ нь урагшаа Энх тайвны гүүрний доорх буюу "Хурд" ХХК-ийн "Apartment KH" хорооллын арын  замтай холбогдох бол хойшоо Үндэсний соёл амралтын хүрээлэнгийн уулзвар руу гарах юм байна.

Мөн баруун тийш Энх тайвны гүүрэн доогуур өнгөрч, "Уран ган" ХХК-ний урд замаар явсаар, Нарны гүүртэй холбогдох гэнэ.

Туннелиэс ҮСАХ-ийн уулзвар орох 22 метрийн урттай зам хэт өгсүүр бөгөөд газар доор дулааны гол магистраль шугам явж байгаа учраас доош ухах боломжгүй юм байна. Иймд хэт өгсүүр энэ хэсэгт хальтрахаас сэргийлсэн товгор хавтан тавихаар төлөвлөжээ.

Гүүр нь 50 метрийн урттай, туннелийн доогуурх зам нь 22 метрийн урттай, 7 метрийн  өргөнтэй энэхүү замын ажлын явц 55 хувьтай явж байна гэж гүйцэтгэгч "Оч Наран" ХХК-ийн захирал О.Наранбаатар хэллээ. Одоо цаг бага зарцуулагддаг ажлууд үлдсэн гэлээ.

Туннель нь 2,3 метрийн өндөртэй учир, жийп машин болон жижиг тэргүүд л явах боломжтой болох гэнэ. Нэмэлтээр явган хүний зам, 1,4 км дугуйн зам болон гэрэлтүүлэг хийх аж.

Нийслэлийн төсвийн нийт 4,3 тэрбум төгрөгөөр хийж буй энэхүү ажлыг аравдугаар сард хүлээлгэн өгөх юм байна.