Барилгын салбарт "европ стандартыг нэвтрүүлэх, нутагшуулах зорилгоор шинээр 160 гаруй стандарт нэвтрүүлж байгаа талаар өнөөдөр Барилга хот байгуулалтын сайд Д.Цогтбаатар болон Стандартчилал хэмжилзүйн газрын дарга Г.Гантөмөр нар мэдээллээ.

Удаан хугацаанд судалгаа хийсний үр дүнд барилгын салбарын норм нормативыг боловсронгуй болгох зорилготойгоор

• евро стандартыг нэвтрүүлэх, нутагшуулах
• евро стандарттай дүйцэхүйц Монгол стандарттай болох
• шинэ техник, технологийг нэвтрүүлэх боломжоор хангах

шаардлагатай байгаа тул эхний ээлжинд

• Барилгын бат бэх, найдварт байдалд тавигдах шаардлага, төлөвлөлтийн зарчмыг тогтоосон 133 стандартын баримт бичгүүд,
• Европын холбооны тодорхойлсон 31 стандартын баримт бичгүүдийг барилгын зураг төсөл, эрдэм шинжилгээ, барилга угсралт, барилгын материалын үйлдвэрийн байгууллагуудад англи хэл дээр нэг жилийн хугацаатайгаар хэрэглэж байхаар шийдвэрлэжээ.

Нэг  жил гэдэг нь хэдий бага хугацаа мэт боловч цаашид хугацааг сунгах, монгол стандарт болгон орчуулан боловсруулж, батлаад хэрэглэх боломжтой болно гэлээ.

Өчигдөр буюу наймдугаар сарын 3-ны өдөр Барилгын хот байгуулалтын сайд дээрх тушаалыг гаргасан байна.

Барилга хот байгуулалтын сайд Д.Цогтбаатар "Европ стандартыг барилгын салбарт нэвтрүүлснээр импортоор орж ирэх барилгын материал чанаржиж, улмаар тухайн материалаар хийгдэх бүтээгдэхүүний чанар дагаад сайжрах болно" гэлээ.

Барилгын чанар сайжирснаар ашиглалтын зардал багасах, хүн амын амьдрах орчин нөхцөл, аюулгүй байдал дээшлэх бөгөөд энэ нь эдийн засгийн үр өгөөжтэй гэдгийг тодотгосон юм. Ингэхийн тулд үүнд хяналт тавьдаг лабораториудын хүчин чадлыг сайжруулах гэнэ.

Стандартчилал хэмжилзүйн газрын дарга Г.Гантөмөр "Монгол улсын барилгын салбарын байгууллага болгонд энэ 160 гаруй стандартыг хэрэгжүүлэх эрх нь нээгдэж байна. Стандартыг нэвтрүүлснээр зураг төсөл, үйлдвэрлэл гээд тогтолцоогоороо өөрчлөгдөн шинэчлэгдэх болно. Мөн импортоор орж ирэх барилгын материалд тавигдах сорил туршилтын чанар шаардлага өндөрсөнө" гэв.