Нийтийн тээврийн үйлчилгээг хүртээмжтэй болгохоор төв зам дагуу явуулах угсраа автобус наймдугаар сарын сүүлээр үйлчилгээнд гарахаар болжээ.

Зургадугаар сарын 26-нд Беларусь улсаас авч буй "МАЗ 215057" маркийн 17 автобусыг хүлээн авах үеэр долдугаар сарын 5-наас 14-нийг дуустал туршилтын хугацаанд үйлчилгээнд явуулж улмаар наймдугаар сарын 15-наас тогтмол явуулахаа албаныхан мэдээлсэн.

Харин долдугаар сард угсраа автобус туршилтаар үйлчилгээнд гараагүй. Тиймээс угсраа автобус хэзээ үйлчилгээнд гарах талаар Нийслэлийн тээврийн газрын Олон нийттэй харилцах ажилтан Д.Болдоос тодрууллаа.

-Долдугаар сард угсраа автобусыг туршилтаар явуулах байсан ч явуулсангүй. Ямар шалтгаанаар явуулсангүй вэ?
-Наадмын үеэр туршилтаар явуулах байсан ч хүлээн авсны дараа улсын дугаар авах, гаражийн дугаар авах зэрэг асуудлаас болоод хойшилсон.

-Тогтмол явуулж эхлэх хугацааг наймдугаар сарын 15 гэж байсан. Хэвээрээ юу?
-Цаг агаарын байдлаас шалтгаалан төв замын засварын хугацаа сунжрах магадлалтай учраас наймдугаар сарын 15-нд үйлчилгээнд гарах эсэхийг хэлэх боломжгүй байна. Уг нь бол төв замын засвар наймдугаар сарын 16-нд дуусна. Гэхдээ дээр хэлсэн шалтгаанаас болоод засвар хойшилчихвол бид угсраа автобусаа үйлчилгээнд гаргаж чадахгүй. Зам засварыг хүлээж байна. Түүнээс биш автобуснууд маань үйлчилгээнд гарахад бэлэн байна.

-Угсраа автобус явуулахтай холбоотой зам засварын ажлууд хийнэ гэж байсан. Бүрэн дууссан уу?
-Угсраа автобус Таван шараас Офицеруудын ордон чиглэлд явах бөгөөд Нийслэлийн автозамын газартай манайхан ярилцаад хоёр тойрогт засварын ажил хийж дууссан. Зарим автобусны буудлыг уртасгах ажлуудыг хийгээд дуусчихсан. Өнгөрсөн хугацаанд шөнийн цагаар туршилтаар автобусаа явуулсан. Тойрох, багтахгүй байх зэрэг асуудал гараагүй.

-Угсраа автобус цахим картаар үйлчлэх үү?
-Ялгаагүй цахим картаар үйлчилнэ.