Хүнс, хөдөө аж ахуйн яамнаас 2015 оны хоёрдугаар хагаст хуурай болон шингэн сүү импортлох зөвшөөрөл олгох аж ахуйн нэгжийн сонгон шалгаруулалт зарлажээ. Монгол Улсын Хүнсний тухай хуулийн 6 дугаар зүйлийн 6.8 дахь заалт болон Засгийн газрын 2013 оны 77 дугаар тогтоолоор баталсан “Стратегийн хүнсийг экспортлох, импортлох зөвшөөрөл олгох түр журам”-д заасны дагуу энэ ажлыг тус яам хариуцан ажилладаг аж.

2015 оны хоёрдугаар хагаст манай улсын хэмжээнд 95 тонн үйлдвэрийн аргаар боловсруулсан шингэн сүү, 1951.0 тонн хуурай сүү импортлох зөвшөөрөл олгох юм байна.

Манай улс 60 сая малтай хэр нь гаднаас сүү авах гэж байгаа нь хачирхалтай. Энэ талаар Хүнс, хөдөө аж ахуйн яамны мэргэжилтнээс тодруулахад, “Хүнсний тухай хуульд стратегийн таван хүнсийг шаардлагатай бол импортоор авах тухай заалт бий. Энэ ажлыг Хүнс, хөдөө аж ахуйн яам хариуцан зохион байгуулдаг.  

-Манай улс сүүнийхээ дотоодын хэрэгцээг хангаж чаддаггүй гэж үү?
-Хүн амынхаа тоог үнээнийхээ тоотой харьцуулахад зуны цагт шингэн сүүний хэрэгцээгээ хангаж байна. Харин сүүгээ нөөцөлж, боловсруулсан шингэн сүү болгоход манай улс хэрэгцээгээ хангаж чаддаггүй. Мөн сүү үйлдвэрлэдэг аж ахуйн нэгжүүд бүтээгдэхүүнийхээ 40-50 хувьд шингэн сүү, үлдсэнийг хуурай сүүгээр орлуулдаг.

Импортоор оруулах гэж буй хуурай сүүг эдгээр компаниуд хэрэглэнэ. Харин 95 тонн шингэн сүү нь катерингийн үйлчилгээнд зориулах юм. МИАТ зэрэг олон улсын хэмжээнд үйл ажиллагаа явуулдаг үйлчилгээний байгууллагуудын стандартын шаардлагыг манайд савласан сүү хангадаггүй. Иймд илүү сайн боловсруулсан сүүг нь импортоор оруулдаг.

-Манай улс жилд хэдий хэмжээний сүү импортоор авдаг вэ?
-Импортоор оруулах сүүний хэмжээг жил бүр гаргадаг. 2015 онд 4000 тонн хуурай сүү импортлохоор заасан. Ирэх оны импортын тооцоо хараахан гараагүй байна.

-Монгол Улс жилдээ хэдий хэмжээний сүү хэрэглэдэг юм бэ?
-Нэг хүн жилд дунджаар 125 литр сүү хэрэглэнэ хэмээн тооцдог.