Монгол Улсад ирдэг жуулчдын ихэнх нь Үндэсний их баяр наадмын өдрүүдэд ирдэг болохыг аялал, жуулчлалын байгууллагууд онцолдог.

Харин энэ оны эхний хагас жилийн байдлаар Монгол Улсад ирсэн жуулчдын тоо 4.8 хувиар буурсан байна. Үүнд БНХАУ-аас Монгол Улсад ирэх жуулчдын тоо 15.2 хувиар, Австралийн жуулчид 14.3 хувиар буурсан нь голлох нөлөөг үзүүлжээ. Монголд ирж байгаа хоёр жуулчин тутмын нэг БНХАУ-аас ирдэг бол сүүлийн үед Украйн, Хонконгийн жуулчид Монголыг илүү сонирхох болсон байна.

Энэ жил Украйнаас ирсэн жуулчдын тоо 37.2 хувиар, Хонгконгийн жуулчдын тоо 19.8 хувиар нэмэгджээ. Үүнээс гадна өнгөрсөн оны 11 дүгээр сараас ОХУ, Монгол Улсын иргэд харилцан визгүй зорчдог болсноор хилээр нэвтэрсэн иргэдийн тоо хоёр дахин нэмэгдсэн гэж хилийн боомтоос мэдээллээ.

Харин ОХУ-аас Монгол Улсад ирэх жуулчдын тоо өнгөрсөн оны мөн үеэс гурван хувиар л нэмэгдсэн болохыг Статистикийн байгууллага онцолж байна. Энэ оны эхний хагас жилд жуулчдын тоо бууралттай гарсан ч хоёрдугаар хагаст энэхүү байдал хадгалагдана гэж МҮХАҮТ-ын дэргэдэх Аялал, Жуулчлалын Зөвлөл үзжээ.

Энэ онд анх удаа Монгол Улс Олон улсын “ITВ” үзэсгэлэнд оролцсон бөгөөд үүний үр дүн шууд мэдэгдэхээргүй байгаа ч хоёр жилийн дараа эрс нэмэгдэж, 4-5 жилийн дараа хоёр дахин нэмэгдэхээр байгааг “Цолмон трэвел” компани онцолж байна.