УИХ-ын гишүүн О.Баасанхүү өнөөдөр мэдээлэл хийлээ. Тэрбээр Өргөдлийн байнгын хорооныхоо шугамаар өнгөрсөн бямба гаригт Тавантолгойн уурхайд ажиллаад иржээ.

Тус уурхай өнгөрсөн дөрөвдүгээр сараас хойш ажиллаагүй бөгөөд цаашид яах нь тодорхойгүй, ажилчид нь айдастай байна. Хөрөнгө оруулалтын гэрээний ажлын явцаас хамааралгүй уурхай ажиллаж байх ёстой. Энэ асуудлаар Монгол Улсын сайд М.Энхсайхан эрх мэдлээ хэтрүүлсэн байж болзошгүй. Тиймээс эрх мэдлээ хэтрүүлсэн, эсэхийг шалгуулна гэлээ.

Тэрбээр Өмнөговь аймгийн Цогтцэций, Ханбогд сумаар орж, иргэдтэй уулзжээ. Ханбогд суманд Оюутолгой компанийн тавьсан зам нэг урсгалтай, сургууль цэцэрлэгийн халаалт,  орчин үеийн жорлон, цэвэр тохилог ариун цэврийн өрөө хийх зэрэг асуудал одоог хүртэл шийдэгдэхгүй байна гэж нутгийн иргэд гомдолложээ.

Байгалийн баялагтаа олборлуулж байгаа орон нутгийн иргэд Эрдэнэт, Дархан шиг хөгжих хүсэлтэй ч Оюутолгой хангалттай ажиллаж чадахгүй байна хэмээн тэрбээр шүүмжиллээ.

Гэрэл зургийг: Б.Бямба-Очир