"Welcome to Mongolia-2015" олон улсын балетын наадам болох гэж байгаатай холбогдуулан өнөөдөр гадаадын шилдэг балетчид болон уг наадмын продюсерээр ажиллаж  буй МУГЖ Д.Алтанхуяг нар мэдээлэл хийлээ.

Тоглолт энэ сарын 18-19-ний өдрүүдэд Монгол улсад зохион байгуулагдах бөгөөд  АНУ, Гүрж, Франц, Испани, Япон, Казахстан, Тайвань улсын балетчин оролцох юм. МУГЖ Д.Алтанхуяг "энэ наадамд маш олон балетчид оролцох хүсэлтэй байна" гэлээ.

Нийт 23-37 насны 12 балетчин “Хунт Нуур”, “Ромео Жульет” “Камэллиа Хатагтай”, “Корсар”, “Мөленруж” зэрэг бүжгэн жүжгийн оргил хэсгүүдээс Монголын үзэгчдэд толилуулна.

Өмнө нь 2011 онд энэ наадам болж байсан бол өдгөө гадаадын жуулчдыг татах зорилготойгоор "Welcome to Mongolia-2015" нэртэйгээр хоёр дахь удаагаа тоглох гэж байна.

Тоглолт зургаадугаар сарын 18-нд 17.30 цагт,  19-нд 19.00 цагт Дуурь бүжгийн эрдмийн театрт болно.

Бельтажны 30, 40 мянган төгрөгийн үнэтэй тасалбар дууссан бол одоо 90 мянга, 100 мянга, 120 мянган төгрөгийн үнэтэй тасалбарууд худалдаалагдаж байна.

Дэлхийн шилдэг бүжигчидтэй ажиллаж, бүжиг дэглэх авъяасаараа номер нэгт тооцогдох балетчин, бүжиг дэглээч Фан И МУГЖ Д.Алтанхуягт зориулж тавьсан бүжгээ хамтран бүжиглэх бөгөөд тоглолтын бас онцлогийг дурдвал морин хуурын ая дор бүжиглэх юм байна.

Бүжиг дэглээч Фан И: "Д.Алтанхуягийн хөдөлгөөний хэмнэлийг хараад урам зориг орсон. Чөлөөтэй, эрч хүчтэй бүжиглэдэг. Түүний хэв маяг, хөдөлгөөн нь соёл гаралтай нь холбоотой байж магадгүй. Чөлөөтэй, задгай өөрийнхөөрөө байж чаддаг." гэлээ.

Монгол улсаа олон улсад сонгодог урлагаар дамжуулан сурталчлах зорилго бүхий "Welcome Mongolia-2015" наадмын бэлтгэл дуусч байна.

Тоглолтын дараа энэхүү бүрэлдэхүүн шууд Японд тоглоно гэлээ.

Балетчидын тоглолтын зургаас танилцуулж байна.