“GoGo News” агентлаг, “Bloomberg TV Mongolia” телевизтэй Хамтран ажиллах санамж бичиг байгууллаа.

Хамтран ажиллах санамж бичигт “GoGo News” агентлагийг төлөөлж Монгол Контент компанийн гүйцэтгэх захирал Г.Гантуяа, “Bloomberg TV Mongolia”-г төлөөлж гүйцэтгэх захирал Э.Долгион нар гарын үсэг зурсан юм.

Энэ үеэр “GoGo News” агентлагийн захирал Г.Гантуяагаас хамтын ажиллагаа үүсгэж буй ач холбогдлын талаар тодрууллаа.

Г.Гантуяа:
-Манай сайтын мэдээллийг өдөрт 200 мянган хэрэглэгч уншиж байна. “Bloomberg TV Mongolia” телевизийн хувьд дэлхийн стандартын дагуу үйл ажиллагаа явуулдаг бизнес, эдийн засгийн суваг. Манай байгууллагууд хамтран ажилласнаар бизнес, эдийн засаг, санхүүгийн орчны мэдээ мэдээллүүд, томоохон контентуудыг хамтран үйлдвэрлэх, “Bloomberg TV Mongolia”-ийн дэлхийн хэмжээний мэдээллүүдийг интернэтийн хэрэглэгчид хүлээн авах боломжоор хангагдаж байна. 

“Bloomberg TV Mongolia” телевизийн Мэдээ, мэдээллийн алба хариуцсан дэд захирал П.Жаргал:

-Монголын хэвлэл мэдээллийн салбарт тэргүүлэгч хоёр байгууллага хамтран ажиллах санамж бичигт гарын үсэг зурлаа. Энэ нь хэвлэл мэдээллийн салбарт ажиллаж байгаа бусад байгууллагын хувьд үлгэр жишээ, сэтгүүлзүйн хувьд ахиц дэвшил гаргах боломж юм.

Нөгөө талаас “Bloomberg TV Mongolia” бол олон улсын сүлжээний том салбар. Энэ утгаараа зөвхөн Монголын үйл явдалд анхаарлаа хандуулахаас гадна дэлхий дахинд, тэр дундаа дэлхийн бизнесийн зах зээлд болж буй үйл явдлыг нийт үзэгчдэд анхдагч эх сурвалжаас нь шуурхай мэдээлдэг. Харин “GoGo News” агентлагтай хамтарснаар бидний бэлтгэж буй мэдээ, мэдээлэл олон нийтэд өргөн хүртээмжтэйгээр хүрэх боломж нээгдэж байна” гэлээ.

Ийнхүү хэвлэл мэдээллийн хоёр байгууллага хамтран ажиллах болсноор “Bloomberg TV Mongolia” телевизийн томоохон нэвтрүүлэг, ярилцлагууд Үндэсний портал GoGo.mn сайтаар нийт интернэт хэрэглэгчид болон дэлхийн өнцөг булан бүрт амьдарч буй монголчууддаа, "GoGo News" агентлагийн бэлтгэсэн нийтлэл, мэдээллүүд телевизийн үзэгчдэд хүрч, тэдний хамтран бэлтгэсэн чанартай контентуудыг мэдээллийн зах зээлд нийлүүлэх боломж бүрдлээ.

Жич: Та бүхэн "Bloomberg TV Mongolia" телевизийн мэдээллүүдийг ЭНД ДАРЖ хүлээн авах боломжтой.