Энэтхэгийн Ерөнхий сайд Нарендра Моди манай улсад анх удаа төрийн айлчлал хийгээд буцлаа. Монголд анх удаа хийсэн энэ айлчлал өнгөрсөн амралтын өдрүүдэд таарсан юм. Зочныг Ерөнхий сайд Ч.Сайханбилэг төв талбайд угтан авсны дараа, тэрбээр төрийн тэргүүн, УИХ-ын даргад бараалхсан. Мөн УИХ-ын хүндэтгэлийн чуулганд үг хэлсэн билээ.

Нарендра Моди, Монголд хийсэн төрийн айлчлалдаа их ач холбогдол өгсөн бөгөөд тэрбээр УИХ-ын чуулганы танхимаас “Миний бие оюун санааны хөрш 1 тэрбум 25 сая анд нөхдийн тань халуун мэндчилгээг энэ хүндтэй танхимд тээж ирлээ” хэмээн Монгол төрийн түшээд, Монголын ард түмэнтэй халуун дотноор мэндчиллээ.

Чуулган дээр хэлсэн үг нь ч энэ айлчлалд ямар их ач холбогдол өгч, хүндэтгэл үзүүлж буйг бид бэлэхнээ мэдэрсэн билээ.

Айлчлалын үеэр хоёр улсын Засгийн газар хооронд хамтран ажиллах 10 гаруй гэрээ, баримт бичигт гарын үсэг зурсан бөгөөд соёл урлаг, боловсрол, эрүүл мэнд, сэргээгдэх эрчим хүч, мэдээллийн технологи зэрэг олон салбарт хамтран ажиллах эхлэл тавигдлаа. Үүн дотроос гадаадын хөрөнгө оруулалтын гачигдалд орсон манай улсын иргэд, хэвлэл мэдээллийнхэн ч ялгаагүй НЭГ ТЭРБУМ ам.долларын хөнгөлөлттэй зээл олгохоор болсныг онцлон цахим орчинд багагүй шуугилаа.

Айлчлал амралтын өдөр таарсан болоод тэр үү хүн амын тоогоороо дэлхийд хоёрдугаар ордог, асар том эдийн засагтай энэ улсын Ерөнхий сайдын айлчлал дуулиан багатайхан өндөрлөв.

Юутай ч хүндэт зочин маань Монголд хийсэн хоёр хоногийн айлчлалдаа сэтгэл хангалуун буцсан тухайгаа өөрийн твиттер хуудсаараа дамжуулан илэрхийлжээ. Тэрбээр “Миний гүн талархлыг Монголын ард түмэнд хүргэе. Оюун санаа нэгтэй танай орноос би маш өндөр сэтгэлтэй буцаж байна” хэмээн сэтгэгдлээ үлдээснийг УИХ-ын дарга З.Энхболд тэргүүтэй 500 гаруй хүн түгээжээ.


Твитерт 12.3 сая дагагчтай тэрбээр Монголд байх үедээ айлчлалынхаа сонин хачныг твитер хуудсаараа дамжуулсаар байв. Цахим орчинд маш идэвхтэй Ерөнхий сайд Монголд айлчилсныхаа дараа чамгүй монгол олон жиргээчдийг араасаа дагуулан буцлаа.

Гэрэл зургийг zasag.mn сайтаас