Ч.Сайнбилэг сар хүрэхгүй хугацаанд “Эрдэнэс-Таван толгой” ХК-ийн гүйцэтгэх захирлын албыг хашиж, өөрийн хүсэлтээр ажлаа хүлээлгэн өгсөн. Иймд өнгөрсөн долоо хоногийн сүүлээр тус компанийг удирдах томилжээ.

Компанийн Төлөөлөн Удирдах зөвлөл 2015 оны тавдугаар сарын 7-ны өдрийн тогтоолоор тус компанийн Борлуулалт, Маркетинг, Ложистикийн газрын захирлаар 2013 оноос хойш ажиллаж байгаа Б.Батбилэгийг гүйцэтгэх захирлын үүрэг гүйцэтгэгчээр томилохоор шийдвэрлэсэн байна.

Б.Батбилэг “Эрдэнэс-Таван толгой” ХК-д 2010 онд ахлах эдийн засагчаар ажиллан, Хувьцаа хариуцсан газрын захирал, Маркетинг, борлуулалт, ложистикийн газрын захирлаар ажиллаж байжээ. Мөн саяхныг хүртэл Санхүү, хөрөнгө оруулалт хариуцсан дэд захирлын үүрэг гүйцэтгэгчээр ажилласан.  

Ингэхдээ “Эрдэнэс-Таван толгой” ХК-ийн борлуулалт, тээвэрлэлтийн бодлогыг сүүлийн гурван жил оновчтой боловсруулж, хэрэгжүүлснээр 2013 онд 2 сая тонн нүүрс борлуулсан бол 2014 онд 5.8 сая тонн нүүрс борлуулжээ.

Нүүрсний хэмжээг 2.9 дахин нэмснээр 400 тэрбум төгрөгийн борлуулалтын орлого олж, улсын төсөвт 58 тэрбум төгрөг төвлөрүүлсэн байна.