Улаанбурхны эсрэг вакцинжуулалт тавдугаар сарын 15-нд орон даяар эхэлнэ. Арав хоног үргэлжлэх нэмэлт вакцинжуулалтад зургаан сартайгаас 5 нас хүртэлх бүх хүүхэд хамрагдана. Ингэхдээ өмнө нь хугацаандаа дархлаажуулалт хийлгэсэн эсэхээс үл хамааран энэ насны бүх хүүхэд хамрагдах аж.

Вакциныг өрхийн эмнэлгийн харьяа вакцинжуулалтын кабинетаар хийх бөгөөд цэцэрлэгийн хүүхдүүдийг цэцэрлэг дээр нь тарина.

Урьдчилан авсан судалгаагаар энэ насны хамрагдвал зохих 370,000 хүүхэд байгаа тооцоо гарчээ. Тиймээс бүх хүүхдэд хүрэлцэхээр вакциныг захиалан, НҮБ-ын Хүүхдийн сан, ДЭМБ-ын тусламжтайгаар авчирсан байна.

Энэ вакцин 10 хүн тунгаар савлагдсан, тарьдаг вакцин юм. Нэг сав вакциныг задалж, найруулснаас хойш 6 цагийн дотор тарьж дуусгах ёстой бөгөөд задалснаас хойш 6 цаг болоод үлдэгдлийг устгах ёстой аж. Иймээс аль болох хаягдал, хорогдолгүйгээр хүүхдүүддээ тарьж, цаашид өвчлөхөөс хамгаалахад анхаарах нь зүйтэй гэдгийг Халдварт өвчин судлалын үндэсний төвөөс анхааруулж байна.

Вакцин тарихаас өмнө заавал эмчийн үзлэгт орно. Тарьж болохгүй заалттай байвал зөвлөгөө өгч, шалтгаан нь арилсны дараа заавал нөхөн вакцинжуулна.

Вакцин тарихад хоцрох эрсдэлтэй явуул, тавиул, түр оршин суугаа, алслагдсан отор нүүдлийн нутагт байгаа, тодорхой оршин суух хаяггүй, гэр оронгүй, өвчин эмгэгийн учир чөлөөлөгдөж хоцордог хүүхдүүдийг эртнээс бэлтгэж заавал вакцинд хамруулахад онцгой анхаарах шаардлагатай байгаа юм.