Чөлөөт бөхийн отгон дэлхийн аварга С.Цэрэнчимэд дэлхийн аваргын алтан бүсээ өчигдөр гардаж авлаа.

“Mongolian open-2015” тэмцээнд С.Цэрэнчимэд 63кг-д жин өгсөж хүрэл медалийн төлөөх барилдаанд үзэгчдийг шуугиулсан барилдаан хийсэн ч харамсалтайгаар ялагдсан.

Тэрбээр Польшийн бөх Моника Михалектай барилдахдаа сүүлчийн секундэд тактикийн алдаа гаргасан.

63кг-ын шагнал гардуулах ёслолын өмнө МЧБХ-ны ерөнхийлөгч Д.Дагвадорж дэвжээнд гарч ирж С.Цэрэнчимэдэд 2014 оны дэлхийн аваргын алтан бүсийг гардуулан өгч баярлууллаа.

С.Цэрэнчимэд “Ташкентийн дэлхийн аваргад түрүүлсний дараа дэлхийн аваргын бүс өгөөгүйд гайхаад л өнгөрсөн. Гэтэл өнөөдөр гэнэтхэн гардуулж өгсөнд үнэхээр их баярлалаа” гэв. Дэлхийн нэгдсэн бөхийн холбооноос дэлхийн аваргын алтан бүсийг МЧБХ-нд илгээсэн байна. С.Цэрэнчимэд Узбекстаны Ташкент хотноо зохиогдсон чөлөөт бөхийн дэлхийн аваргын финалд Азербейжаны бөх Раткевичтай барилдаж 12:3 –аар ялж алтан медаль хүртсэн билээ.