Энэ баасан гарагаас бямба гарагт шилжих шөнө өөрөөр хэлбэл гуравдугаар сарын 28-ны 02.00 цагаас зуны цагийн хуваарьт шилжинэ.

Ингэхээр та цагаа нэг цагаар урагшлуулан 03.00 цаг дээр тааруулах юм.

Гуравдугаар сарын 9-ний өдрийн Засгийн газрын хуралдаанаас орон даяар зуны цагийн тоололд шилжих шийдвэрийг гаргасан.

Зуны цагийн хуваарь есдүгээр сарын 25-наас 26-нд шилжих шөнийн 00.00 цаг хүртэл үргэлжилнэ.

Монгол Улс дэлхийн улс орнуудын жишгийн дагуу "Ажлын өдөрт өөрчлөлт оруулах тухай" Сайд нарын зөвлөлийн 1960 оны 245 дугаар тоот тогтоолоор анх удаа цаг урагшлуулах шийдвэрийг гаргаж байжээ.

Улмаар 1985 оны 74 дүгээр тоот тогтоолоор жил бүрийн гуравдугаар сарын сүүлийн долоо хоногийн ням гаригаас эхлэн есдүгээр сарын сүүлчийн ням гараг хүртэл БНМАУ-ын нутаг дэвсгэрт цагийн тооллыг нэг цагаар урагшлуулан, ажил үйлчилгээний эхлэх цагийн хуваарийг хэвээр мөрдөж байсан юм.

Энэхүү тогтоол нь 1999 оныг хүртэл 14 жил хэрэгжсэн бөгөөд 1999 онд хүчингүй болж, Засгийн газрын 2001 тогтоолоор дахин зуны цаг тооллыг мөрдөж эхэлсэн байдаг. Гэвч 2005 онд Засгийн газраас уг тогтоолыг дахин хүчингүй болгосон байна.