Зүүн Тимор-Монголын хариу тоглолт хэдхэн цагийн дараа Монголын Хөлбөмбөгийн холбооны ногоон талбайд зохион байгуулагдах гэж байна.

Зүүн Тиморын шигшээ багийн ахлах дасгалжуулагч Фабио Хоаким Масиел Да Сильва тоглолтын талаар юу  хэлснийг сонирхуулъя.

-Монгол оронд ирсэн сэтгэгдэл ямар байна вэ?
-Монголчууд их сайхан хүлээж авсанд бид бүхэн үнэхээр их баяртай байна. Монголын ард түмний зочломтгой зан Зүүн Тиморынхоос өөр юм байна.

-Нутагтаа болсон тоглолтод Монголын багийг 4:1-ээр буулгаж авсан?
-Зүүн Тиморт болсон  тоглолт бол зөвхөн эхлэл.  Хоёр дахь тоглолт бол хамгийн чухал. Манай багийн хувьд бэлтгэл маш сайн байгаа. Цаг агаарын хувьд хүндрэлтэй байгаа ч миний хувьд асуудал биш. Бид бүхэн сайн тоглохыг хичээх болно.

-Эхний тоглолтын дараагаар Монголын багийг хэрхэн дүгнэсэн бол?
-Цаг агаарын хувьд Монголын хөлбөмбөгчдөд яалт ч үгүй хэцүү байсан байх. Би өөрөө тоглогч байсан хүний хувьд энэ зовлонг мэднэ. Хүйтэн сэрүүн цаг агаарт амьдардаг тоглогч нар халуун тоглоход үнэхээр амаргүй. Монголын багийн мэдээлэл надад тааруу олдсон ч эхний тоглолтоор судалсан. Монголын хөлбөмбөгчдийн эсрэг юу хийхээ сайн мэдэж байгаа.

-Монголын эсрэг тоглолтод гарааны 11-д өөрчлөгдөх үү?
-Миний хувьд шигшээ багийг авсан цагаас нэг л зарчмыг баримталж ирсэн. Надад 11 тоглогч биш бүтэн баг бий. Хэнийг нь гараанд гаргасан 100 хувь тоглолт үзүүлэх ёстой. Тоглогч бүр талбайд гарсан бол өөрийн хийх ёстой ажлаа сайн гүйцэтгэх ёстой. Гарааны 11-д багтах эсэх нь чухал биш. Хэнийг ч дуудаж болно. Зүүн Тиморт болсон тоглолтыг Итали дасгалжуулагч удирдаж оролцсон. Харин энэ удаагийн тоглолтыг би хариуцна.

-Зүүн Тимор улсын дотоодын лигт хэчнээн баг тоглодог вэ?
-Шигшээ багийн албыг аваад 30 хонож байгаа учраас энэ талаар нарийн мэдээлэл алга. Уучлаарай.