Герман Улсын Берлин хотноо гуравдугаар сарын 3-8-нд болох аялал жуулчлалын олон улсын үзэсгэлэнд Монгол Улс түнш орноор оролцох гэж байгаа билээ. Тэгвэл уг үзэсгэлэнд оролцох  бэлтгэл ажлыг хангаж буй “Аялал Жуулчлал – Ирээдүй” нийгэмд үйлчлэх ТББ-аас монголын түүх, байгаль, зан заншил, ахуй амьдрал, хөгжил дэвшил, онцлогийг харуулсан Mongolia сэтгүүлийг англи, герман, франц хэл дээр эрхлэн гаргажээ. Сэтгүүлийг ITB Berlin үзэсгэлэнгийн үеэр тус үзэсгэлэнд оролцогчдод тараах юм байна.

Монгол Улсыг дэлхийд сурталчлахад эерэг, зөв мэдээлэл бүхий ном товхимол, нэвтрүүлэг, кино зэрэг материалуудын мэргэжлийн өндөр түвшинд бүтээх, түгээх зайлшгүй шаардлагатай бөгөөд уг сэтгүүл нь манай улсыг гадаад улс орнуудад таниулахад нэгэн чухал хэрэгсэл болох юм.

Гурван хэл дээрх “Mongolia” сэтгүүл нийт 40000 хувь хэвлэгдсэн бөгөөд сэтгүүлийн орос, япон, хятад хэл дээрх хувилбарууд удахгүй бэлэн болно.

Сэтгүүлийн онлайн хувилбарыг “Аялал Жуулчлал–Ирээдүй” ТББ-ын Facebook хуудаснаас 3 (англи, франц, герман) хэл дээр нь үзэж, татаж авах боломжтой юм.