ХХАА-н Дэд сайд Б.Батзориг БНХАУ-ын “ЭКЗИМ” банкны төлөөллийг хүлээн авч уулзлаа.

Уулзалтаар БНХАУ-ын Засгийн газраас Монгол Улсын Засгийн газарт олгох экспортын зээлийн хөрөнгөөр санхүүжих "Сүүний хөргөлтийн төвийн техник, тоног төхөөрөмж нийлүүлэх", "Үр тариа хадгалах элеватор байгуулах" тендерийг хэрхэн хэрэгжүүлэх талаар ярилцсан.

Тухайлбал, тус улсын Засгийн газрын хөнгөлөлттэй зээлийн 20,4 сая ам.долларын хөрөнгө оруулалтаар тариалангийн бүс нутгуудад үр тариа хадгалах зориулалттай 91 мянган тоннын нийлбэр багтаамжтай элеватор барьж байгуулах бол сүүний хөргөлтийн тоног төхөөрөмж нийлүүлэгдсэнээр нийслэлчүүдийг тасралтгүй шингэн сүүгээр хангах нөхцөл бүрдэх юм.

Тиймээс уулзалтын үеэр хоёр тал санал бодлоо солилцсоны эцэст хэд хэдэн чухал асуудлыг дахин судлан нягталж, товлосон хугацаанд нь байгуулахаар ярилцлаа.

Дашрамд, манай улсын хүнсний үйлдвэрийн тэргүүлэх чиглэлд сүү, үр тарианы салбар хамаардаг тул сүүний хөргөлтийн төвүүд болон үр тариа хадгалах элеватор байгуулах нь хүн амын хүнсний хангамж, эрүүл мэнд, эдийн засгийн өндөр ач холбогдолтой юм.