Өчигдөр буюу хоёрдугаар сарын 4-ний өдөр “Хаан гэр” ресторанд гарсан галыг унтраахад 203 тонн ус зарцуулж, арван цагийн дараа бүрэн унтраажээ.

Тус ресторанд гал гарч буй талаар мэдээлэл 15:33 минутанд Цагдаагийн ерөнхий газрын Мэдээлэл шуурхай удирдлагын төвд ирсэн байна. Дуудлага авснаас хойш 7 минутын дотор гал гарч буй газар онцгой байдлын албан хаагчид очсон. Аврах гал унтраах 10-р ангийн 20 автомашин, 70 албан хаагч 01:49 цагт галыг бүрэн унтраажээ.

Галын талаар Нийслэлийн онцгой байдлын газрын Гал түймэртэй тэмцэх хэлтсийн дарга, онцгой байдлын хурандаа Д.Эрдэнэбаатар,

“Тухайн үед 21х65 метрийн харьцаатай ресторан, пивоны үйлдвэрт гал гарсан байна. Гал нэлээн дэлгэрсэн байсан учраас онцгой байдлынхан ажиллахад хүндрэлтэй байсан. 1957 онд барьсан хуучны барилга учраас зураг нь олдохгүй хүндрэлтэй байлаа. Барилгын бүтээц хялбархан шатах материалаар хийсэн учраас гал хурдан тархсан байсан. Өөрөөр хэлбэл, хуванцар материал ихтэй байсан учраас хорт хийн хэмжээ дээд цэгтээ хүрсэн байсан” гэлээ.

Галыг бүрэн унтраах хүртэл нэлээд хугацаа өнгөрсөн, мөн ихээхэн хэмжээний ус зарцуулах болсон шалтгааныг барилгын хийсэн хийц, бүтээц нь шатамхай, олон давхар байсантай холбоотой аж. Гал сөнөөгчид хүнд нөхцөл байдалд ажиллаж, тархалтыг 20:30 цагт зогсоожээ. Үүний хүчинд хоёр давхар барилгын нэг давхрыг бүрэн аварсан байна.

Сүхбаатар дүүргийн цагдаагийн нэгдүгээр хэсэг хэрэг бүртгэл, галын шалтгаан дээр ажиллаж байгаа юм байна.