Нийслэлийн Засаг даргын “Сар шинийн баярыг угтсан зарим арга хэмжээний тухай” А/74 тоот захирамжийн дагуу сар шинийн баяр болох гэж байгаатай холбогдуулан нийслэлийн замын хөдөлгөөний ачааллыг бууруулах зорилгоор амралтын өдрүүдэд автомашины улсын дугаарын сүүлчийн орноос хамаарч тэгш, сондгойгоор замын хөдөлгөөнд оролцуулж, нийтийн тээврийн буухиа үйлчилгээг явуулахаар болсон.

Энэ хүрээнд Дэнжийн 1000, Нарантуул зах руу нэгдүгээр сарын 31, хоёрдугаар сарын 1-ний амралтын өдөр автобусны буухиа үйлчилгээ явж эхэлсэн бөгөөд хоёрдугаар сарын  7, 8, 14, 15-ны амралтын өдөр Дэнжийн 1000 руу М:28, М:33, М:36, М:42 чиглэлийн автобус иргэдэд үйлчилнэ.

Мөн Нарантуул худалдааны төв рүү эдгээр амралтын өдөр 10, 11, 12, 14, 16 цагаас Орбит, Нарангийн гол, Тахилт, Улаан хуаран, Шархад, Бэлх, Чингэлтэй, Дэнжийн 1000, Яармаг, Нисэх, Баянхошуу, Ханын материал чиглэлийн автобусны буухиа үйлчилгээ явуулах бол 11, 12, 13, 15, 17 цагт Нарантуул захаас нийтийн тээвэр явна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.