Канадад төвтэй “Саусгоби сэндс” ХХК-д холбогдох хэргийг нэмэлт мөрдөн байцаалтад хоёр ч удаа шилжүүлсний эцэст Дүүргийн эрүүгийн хэргийн анхан шатны хоёрдугаар шүүхэд шилжүүлсэн гэж УПЕГ-аас энэ сарын 16-нд мэдээлсэн юм.

Ашигт малтмалын газрын даргаар ажиллаж байсан Д.Батхуягийг эрх мэдлээ урвуулан ашигласан, хахууль авсан хэрэгт, “Саусгоби сэндс” ХХК-ийн гүйцэтгэх захирал асан Жастин Капла, санхүүгийн ерөнхий менежер асан, Филиппиний иргэн Хиларион В.Кажуком нарыг их хэмжээний татвараас зайлсхийсэн гэж үздэг. Энэ хэргийг шүүх хурал энэ сарын 22-нд болох байсан ч 29-нийг хүртэл хойшилсон юм.

Харин Уул уурхайн яамны Бодлогын хэрэгжилтийг зохицуулах газрын дарга Б.Батхүү “Гадаадын хөрөнгө оруулалттай компаниудын татварын маргааныг олон улсын жишгээр шийдвэрлэх учиртай. Ингэснээр манай уул уурхайн салбарт гадны хөрөнгө орж ирнэ. Саусгоби сэндс компанитай холбоотой яригдаж байгаа тоонуудын талаар Уул уурхайн яам тайлбар өгөх шаардлагагүй. Энэ бол мөрдөн байцаагчид, шинжээчдийн хийх ажил” гэсэн юм.